Meta kujton poetin Havzi Nela: Litari i xhelatëve nuk do ta vrasë demokracinë
“Ëndrra e çdo shqiptari, Shqipëria si gjithë Europa. Vargjet e poezisë së Havzi Nelës edhe sot gjëmojnë me një forcë të jashtëzakonshme”
32- vjetori i vdekjes së poetit martir nga Kukësi, Havzi Nela, ka shërbyer që Presidenti Meta t’i rikthehet retorikës së tij kundër komunizmit dhe atyre që sipas tij pengojnë demokracinë dhe ëndrrën e shqiptarëve për një Shqipëri si Europa.
Duke shpërndarë poezinë me titull “O Liri, O Vdekje”, Presidenti Meta ka dhënë disa mesazhe të forta antikomuniste, teksa thotë se vargjet e tij janë ende shumë të forta edhe në ditët e sotme. “Litari i xhelatëve që i shteri frymën e fundit poetit disident dhe martirit të fjalës së lirë Havzi Nela, nuk do mundë kurrë të vrasë demokracinë, dinjitetin dhe të drejtat e njeriut, si dhe ëndrrën e çdo shqiptari për një Shqipëri si gjithë Europa. ‘ Liria më thërret, vdekja nuk më tund’, vargjet e poezisë së Havzi Nelës edhe sot gjëmojnë me një forcë të jashtëzakonshme”, shkroi Presidenti në postimin e tij në “Facebook”, duke i bashkëngjitur edhe poezinë e vitit 1987. Por këto mesazhe antikomuniste dhe sidomos në përkujtim të poetit martir Havzi Nela, Presidenti Meta nuk i bën për herë të parë. Më herët, duke marrë shkas nga fakti që babai i Kryeministrit Rama, Kristaqi, ka qenë një nga firmëtarët që ka vendosur për varjen e poetit Havzi Nela, Presidenti Meta ka thënë se një gjë e tillë nuk është motiv krenarie. “Edi Rama e ftoi sot popullin shqiptar në një përballje historike. Ai u mburr sot se është djali i komunistit që vari në mes të Kukësit poetët për fjalën e lirë. Ne shqiptarët do t’i përgjigjemi shqiptarisht deri në fund”, shkroi Meta pak ditë më parë në një reagim në rrjetet sociale, pak orë pasi Kryeministri i kishte kushtuar një promemorie të atit dhe ku theksoi se vërtet Kristaq Rama kishte qenë komunist, por ai vetë nuk kishte asnjë lidhje me komunizmin. Sakaq, Kryeministri Rama e cilësoi si të turpshme këto akuza të Presidentit Meta. Sipas tij, vepra e Kristaq Ramës do të mbetet në histori dhe për ato që thotë Meta nuk ndien gjë tjetër veçse keqardhje.