Meta: Shkelja e “5 qershorit”, atentat ndaj së ardhmes

“Përfaqësimi dhe mbrojtja e Shqipërisë në gjykatat e arbitrazhit është kthyer në rrezik të madh shtetëror dhe ekonomik”

Presidenti Meta e cilësoi dje shkeljen e marrëveshjes së 5 qershorit një atentat ndaj së ardhmes europiane të vendit.

Në komunikimin e përjavshëm me gazetarët, teksa u pyet nëse do të rrëzojë me dekret ndryshimet e njëanshme të Kodit të ri Zgjedhor, Meta kërkoi respektimin e marrëveshjes të ndërmjetësuar dhe me faktorin ndërkombëtar. “Nëse do të shkelet ‘ 5 qershori’, përgjegjësia do t’u mbetet atyre apo atij që e shkel, sepse unë do ta konsideroj atentat kundër të ardhmes europiane të Shqipërisë, kundër bashkëjetesës demokratike dhe qytetare midis të gjithë qytetarëve të Shqipërisë dhe si përpjekje për të instaluar një grusht shteti apo një juntë në Republikën e Shqipërisë, që nuk do të pranohet me çdo lloj çmimi nga Presidenti dhe gjithë shqiptarët, nuk flas për shqipfolësit, por për shqiptarët, ata që ndjejnë shqip dhe janë krenarë për origjinën e tyre dhe 100 vjet shtet”, tha kreu i shtetit. Ai u bëri thirrje qytetarëve që të mos lejojnë instalimin e një grushti shteti. “Nuk mund të lejojmë dhe nuk do të lejojmë instalimin e një grushti shteti, do të bëhet një shembull për gjithë botën. Çdo shqiptar, jo vetëm me votë, por edhe me poezinë e Havzi Nelës ‘ Ja liri, ja vdekje’ dhe me çdo mjet tjetër legjitim do të ekzekutojë rivendosjen e rendit kushtetues, të demokracisë dhe të sovranitetit të plotë të popullit shqiptar që ka kaq kohë që nëpërkëmbët. Të jeni të sigurt se socialistët do të jenë të parët, se i dhanë Shqipërisë Kushtetutën më demokratike pas greminës së ’ 97- ës me referendum”, tha Meta.

ARBITRAZHI Presidenti Meta akuzoi qeverinë se po rrënon financat e vendit nga detyrimet e shkaktuara nga humbja e disa çështjeve në arbitrazhin ndërkombëtar. Ai iu referua kompanisë “Kurum”, e cila ka paditur Shqipërinë në arbitrazh ndërkombëtar, duke kërkuar një dëmshpërblim me vlerë të raportuar prej 100 milionë eurosh, për prishjen e kontratës së terminalit të kontejnerëve në Portin e Durrësit. “Padia kundër shtetit shqiptar nga një investitor i huaj në vendin tonë, që sipas mediave, kërkon 100 mln euro dëmshpërblim. Përfaqësimi dhe mbrojtja e Shqipërisë në gjykatat e arbitrazhit ndërkombëtar është kthyer në rrezik të madh shtetëror dhe ekonomik”, tha Meta. Sipas tij, Presidenti ka kërkuar informacion nga Avokatura e Shtetit që me 13 korrik të këtij viti, kur çështja u publikua në media, por nuk ka asnjë përgjigje edhe pse kanë kaluar dy muaj e gjysmë. “I kam kërkuar Avokaturës së Shtetit të dhëna për numrin e çështjeve dhe strukturën që ndjek, numrin e çështjeve të fituara dhe të humbura, të dhëna mbi efektin financiar, shpenzimet administrative. Nuk ka informacion prej dy muajsh e gjysmë”, tha ai. Kreu i shtetit tha se pas heshtjes fshihen qëllime të errëta, ndaj dhe apeli ishte i qartë. “Heshtje e plotë. Kjo nuk tregon paaftësi d hepapërgjegjshmëri m, por përpjekje e hapur për të fshehur informacionin për detyrimet e shtetit ndaj çështjeve të humbura në Arbitrazh. Kur Avokatura guxon të mos i kthejë përgjigje Presidentit, tregon se brenda saj përfshihet një qëllim kriminal dhe do të japë përgjegjësi”. LISTAT E HAPURA Kreu i shtetit akuzoi Kryeministrin Rama se nuk pranon listat 100% të hapura nga frika se nuk e votojnë as socialistët. “Lojërat me Kodin t’i lërë, sepse duhet ta dijë që është i pashpresë, në rast se humbjen e tij, që e kupton çdo qytetar, kërkon ta kthejë në një tragjedi për shqiptarët. Të respektojë marrëveshjen e 5 qershorit. Duhet të hapë listat 100%. Por ai nuk e bën këtë gjë. Ishte një mashtrim për të prishur marrëveshjen e 5 qershorit. E dini ju pse ai nuk i hap listat?! Jo vetëm se i del jashtë kontrollit PS- ja, sepse nuk do të votojnë oligarkët, por socialistët, por ai me lista të hapura nuk del në asnjë qark deputet. Ky është raporti i tij me vetë socialistët dhe me vetë shqiptarët”, tha Meta. Sipas Presidentit Meta, Rama është i pashpresë dhe humbjen në 25 prill kërkon ta kthejë në tragjedi për shqiptarët. “Nuk janë socialistët që i bëjnë këto gjëra. Është një sekt që ka shfarosur çdo vlerë pozitive të PS- së, i cili ka zëne për gryke PS- në dhe kërkon të zërë gjithë Shqipërinë, i cili është i sponsorizuar nga faktorë që kërkojnë defaktorizimin e Shqipërisë dhe shqiptarëve. Është mashtrim i madh edhe përpjekja që bën Rama për t’u thënë socialistëve që i mban në pushtet, për të nxitur ata në një betejë jetë a vdekje. Jo për pushtetin e PS- së, por për oligarkët dhe bandat”, tha Meta.