Pensionistët, emrat që përfitojnë shtesën e re

ISSH ka miratuar dje listën e re të pensionistëve që marrin shtesën deri në 5 mijë lekë në muaj. Gazeta boton emrat e minatorëve, naftëtarëve e metalurgëve në gjithë vendin

Janë 226 pensionistë nga radhët e minatorëve, naftëtarëve dhe metalurgëve që iu është miratuar shtesa e re e pensionit. Instituti i Sigurimeve Shoqërore ka publikuar një ditë më parë listën e përfituesve në Tiranë dhe rrethe.

Shtesa për këto tri kategori varion nga 12 për qind deri në 20 për qind mbi masën e pensionit. Kjo, sepse ligji përcakton që rritja për minatorët të bëhet me 1 për qind për çdo vit pune në nëntokë, ndërsa për naftëtarët dhe metalurgët me 0.6 për qind. Këtë shtesë mbi pension e përfitojnë të gjithë personat që kanë jo më pak se 6 vite në profesionet dhe punët e përcaktuara si të vështira dhe shumë të vështira. Konkretisht, nëse një ish- punonjës i nëntokës merr aktualisht një pension mujor prej 20 000 lekësh dhe ka punuar në nëntokë 25 vite, ai përfiton një shtesë prej 25 për qind të masës së pensionit, pra 5 000 lekë në muaj. Për naftëtarët dhe metalurgët, shtesa është me 0.6 për qind për çdo vit pune në sektor. Një tjetër ndryshim i zyrtarizuar me ligjin e ri është edhe ulja e pragut kontributiv. Minatorët, naftëtarët dhe metalurgët mund të përfitojnë pension të plotë, duke pasur vetëm 30 vite kontributive dhe jo 37. Me anë të ligjit të ri, qeveria i ka bërë të qarta edhe kushtet kur mund të përfitohet. Përveç pragut kontributiv, që për minatorët është 12.5 vite dhe për naftëtarët dhe metalurgët 15 vite për gratë dhe 20 vite për burrat, është caktuar edhe një kusht tjetër: mosha e daljes në pension. Në këtë mënyrë, duhet që pensionistët që u përkasin këtyre tri kategorive, të kenë mbushur moshën e daljes në pension të përcaktuar në ligjin për sigurimet shoqërore, pra, 65 vjeç për burrat dhe 61 vjeç për gratë.