Ilirjan Celibashi merr edhe votat e opozitës, kush janë anëtarët e rinj
Parlamenti votoi dje anëtarët e rinj të Komisionit Qendror të Zgjedhjeve. Institucioni i administrimit të zgjedhjeve nuk do të jetë më me 7 anëtarë, por me 12, ku një do të jetë kryekomisioneri dhe do të ketë një ndihmëskomisioner. Po ashtu, do të funksionojnë edhe dy komisione: Komisioni Rregullator dhe ai i Ankesave dhe Sanksioneve, të dy me nga 5 anëtarë. Me vota maksimale, deputetët votuan në krye të institucionit më të rëndësishëm të zgjedhjeve Ilirjan Celibashin, figurë e cila mori edhe pëlqimin e opozitës jashtëparlamentare. Deputetët e pranishëm në seancë i dhanë besimin me 106 vota pro Ilirjan Celibashit në postin e Komisionerit Shtetëror të Zgjedhjeve. Ilirjan Celibashi vjen nga një eksperiencë e gjatë si jurist i spikatur dhe me administrimin e zgjedhjeve. Kujtojmë se ka drejtuar KQZ- në në periudhën 2001– 2006, ku përgatiti dhe administroi zgjedhjet për Kuvendin e Shqipërisë të vitit 2001 dhe 2005, si dhe zgjedhjet për organet e qeverisjes vendore të vitit 2003. Në zgjedhjet e përgjithshme për Kuvendin e Shqipërisë të 23 qershorit 2013, z. Celibashi u zgjodh deputet i qarkut të Fierit për Partinë Socialiste, ndërsa mori postin e Ministrit të Shtetit për Marrëdhëniet me Parlamentin. Tashmë ai do të mbajë detyrën e Komisionerit Shtetëror të Zgjedhjeve me një mandat 7- vjeçar me të drejtë rizgjedhjeje. Komisioneri Shtetëror është organ monokratik me kompetenca kryesore, drejtimin dhe mbikëqyrjen e veprimtarisë së administratës zgjedhore gjatë zgjedhjeve dhe referendumeve. Me mbi 100 vota u zgjodhe edhe nënkomisionerja Lealba Pelinku. Znj. Pelinku ka mbi supe barrën për të realizuar identifikimin biometrik të zgjedhësve në votimet e 25 prillit 2021. Pelinku është një emër i propozuar nga PD- ja, por në Parlament mori votat e maxhorancës dhe opozitës parlamentare. Zonja Pelingu vjen nga radhët e PDsë, pasi ka mbajtur postin e drejtueses së Departamentit Antikorrupsion në Partinë Demokratike. Emra të njohur gjithashtu janë miratuar edhe në përbërje të Komisionit të ri Zgjedhor, ndër to edhe avokati i njohur Ledio Braho. Kujtojmë se Braho ka bërë mbrojtjen e ish- deputetit Ervin Salianji në çështjen e njohur si dosja “Babale”. Pjesë e listës së re përbërëse janë edhe Elvis Çefa, ish- nënkryetar i KLD- së, si edhe Helga Vukaj, ish- ministre e Financave në qeverinë teknike të 2017- ës, e cila ka punuar për vite me radhë në administratën e lartë shtetërore, duke mbajtur poste nga më të ndryshmet.