Ndryshimet në qeveri, Rama: Gati vlerësimi për ministrat
“Ndërveprim të ri me anëtarësinë e partisë jo vetëm për deputetët”
Në përfundim të takimit të përjavshëm me drejtuesit politikë të qarqeve, Kryeministri Rama bëri me dije se do të ketë një proces vlerësimi nga qytetarët edhe për punën e ministrave.
Duke u ndalur para gazetarëve në dalje të PS- së, Rama theksoi se procesi për të vlerësuar ministrat nuk do të bëhet vetëm nga anëtarët e partisë siç do të jetë ai për ekipin e deputetëve. Sipas shefit të qeverisë, bëhet fjalë për një proces që synon një ndërveprim të ri të strukturave të partisë me anëtarësinë e thjeshtë. “I vetmi lajm për të ardhmen vjen nga PS- ja, të gjitha të tjerat janë lajme të vjetra ose burime të thara. Ne vazhdojmë punën dhe diskutojmë për gjendjen në të gjitha aspektet në çdo komunitet. Jemi në procesin e një ndërveprimi të ri me anëtarësinë që ka filluar të marrë kodet dixhitale për të dhënë vlerësimin për deputetët e qarkut. Pas pak ditësh do të dalë edhe kërkesa për vlerësim për ministrat, që do të jetë edhe përtej anëtarësisë. Pra, çdokush që është i interesuar, do mund të hyjë të bëjë një vlerësim dhe ndërkohë përgatisim dhe hapin e tretë që është ftesa për të konsideruar shprehje interesi për të përfaqësuar komunitetin në Parlament me skuadrën e PS- së. Për sa i përket punës së bërë deri tani, është një çështje e brendshme e PS- së. Është një proces që vazhdon dhe është pozitiv. Për emrat e kryesisë së re, nuk flas sot për atë që do të ndodhë të premten. Ka shumë kohë deri atëherë”, tha Rama, që në fjalën e tij nuk pranoi të fliste për atë që do të ndodhë në asamblenë e socialistëve të premten. Gjithashtu, kryesocialisti nuk pranoi të përgjigjej nëse do të kishte një riintegrim në strukturat drejtuese të PS- së për ishministrin e Jashtëm Ditmir Bushati. PROGRES- RAPORTI Ndërkohë, sa i përket çështjes së progres- raportit, Kryeministri Rama nuk pranoi të japë shpjegime, pasi ende nuk kishte mundur që ta lexonte. Sidoqoftë, kreu i qeverisë nënvizoi në fjalën e tij se bëhet fjalë për një raport, në të cilin bien poshtë të gjitha pretendimet që ka ngritur së fundi opozita jashtë Kuvendit. Sipas Ramës, e gjitha ajo sa është thënë për mundësinë e bllokimit të rrugës së integrimit të Shqipërisë, nuk është gjë tjetër veçse pjesë e luftës për pushtet që bëhet në kampin opozitar. “Të them të vërtetën, nuk e kam lexuar ende progres- raportin, sepse kam qenë i angazhuar me punë të tjera dhe nesër pres komisionerin dhe do të diskutoj më gjatë me të. Por sigurisht më vjen mirë që progresraporti është një pasqyrë e ndryshme nga ato që paraqesin të tjerët që flasin në emër të Europës, por ndërkohë kanë hesapet e luftës së ethshme për pushtet në opozitë. Më vjen shumë mirë që edhe deklarata e BE- së lidhur me Reformën Zgjedhore ishte e kundërta nga ajo që tha opozita që paralajmëroi re të zeza mbi Shqipërinë dhe duke hedhur helm e tym që ta kapi kush ta kapi... për të shkuar pas atyre që duan të çojnë njerëzit në rrugët e tyre qorre në luftën për pushtet, që nuk do të dalë asgjëkund”, deklaroi Kryeministri Rama pas mbledhjes në selinë e PS- së me drejtuesit politikë të qarqeve.