Pandemia, Sejko: Rënia ekonomike deri në 7.6%
“Ne parashikojmë që ekonomia vitin e ardhshëm do të ngrihet, nëse nuk do kemi skenar të përkeqësuar të pandemisë”
Ekonomisë do t’i duhet kohë të rimëkëmbet pas goditjes së marrë nga pandemia COVID19. Nuk do të jenë tre muajt e fundit që do t’i japin frymëmarrjen e munguar, me gjasë as viti që vjen nuk do të mjaftojë për një rikuperim të plotë.
Të gjitha projeksionet e deritanishëm flasin për një ringritje të ngadaltë të kushtëzuar nga ecuria e pandemisë. Në të njëjtën linjë me institucionet ndërkombëtare, edhe Guvernatori i Bankës së Shqipërisë, Gent Sejko, tha se për këtë vit rënia ekonomike parashikohet në nivelin 7.6 për qind. “Për tkurrjen ekonomike, Banka Shqiptare parashikon rënie. Jemi në të njëjtën linjë për parashikimin e rënies ekonomike nga institucionet ndërkombëtare, nuk ka një shmangie, parashikimi deri tani është në nivelin 7.6%, por ndryshojnë në mënyrë frekuente javë pas jave. Kjo është një krizë e paprecedentë. Ka rëndësi që ne parashikojmë se ekonomia vitin e ardhshëm do ngrihet, nëse nuk kemi skenar të përkeqësuar të pandemisë. Ka rëndësi edhe harmonizimi e hartimi i politikave mes Bankës dhe Qeverisë. Ne presim që ekonomia të kthehet në ringritje në vitin tjetër, presim që këta dy- tre muaj të kemi përmirësim të situatës ekonomike, kemi indikacione për këtë, edhe nga anketat e zhvilluara. Kemi elemente pozitive që vërtetojnë kthimin, por në përgjithësi 2020 do jetë në territor negativ”, tha Guvernatori gjatë një bashkëbisedimi me gazetarët. I pyetur mbi rritjen e borxhit publik, Sejko tha se është një element rreziku që duhet adresuar në të ardhmen. “Borxhin e kam theksuar që është më e keqja e domosdoshme, vendet e rajonit dhe më gjerë, të prekur nga kriza kanë rritur borxhin e jashtëm dhe të brendshëm. Rritja e nivelit të borxhit është e pranuar në një situatë krizë, por është element rreziku dhe duhet adresuar në të ardhmen. Do duhet t’i kthehemi konsolidimit fiskal, uljes së nivelit të borxhit dhe deficitit. Jemi në këtë situatë dhe duhet të menaxhojmë kapërcimin e krizës dhe objektivi është ulja e borxhit”. Në mbledhjen e djeshme, Këshilli Mbikëqyrës i Bankës së Shqipërisë mori në shqyrtim dhe miratoi Raportin e Ndërmjetëm të Politikës Monetare. Sipas Guvernatorit të BSH- së, ndikimi i pandemisë në ekonomi ka qenë i plotë dhe serioz në tremujorin e dytë, por ka ardhur drejt reduktimit në muajt në vazhdim. Stimuli i njëkohshëm fiskal, monetar dhe financiar ka rezultuar efektiv në shmangien e pasojave më negative të goditjes. “Pandemia Covid- 19 është sfida më serioze, me të cilën është përballur ekonomia botërore gjatë dekadave të fundit. Aktiviteti ekonomik në shumicën e ekonomive ka shfaqur norma dyshifrore rënieje, papunësia është rritur, ndërsa gjendja financiare e sektorit privat është përkeqësuar. Masat e paprecedenta fiskale dhe monetare kanë lehtësuar impaktin e pandemisë, por perspektiva e rikuperimit mbetet ende e rrethuar nga pasiguri”.