Presidenti pas takimit me KomisionerineKE: Nuk e dekretoj Kodin
Meta: Për t’i dhënë edhe një mundësi Kuvendit njëpartiak të tërhiqet nga minimi i procesit zgjedhor
Presidenti Meta i ka transmetuar Komisionerit të Zgjerimit, Oliver Varhelyi, se nuk do ta dekretojë Kodin Zgjedhor të miratuar në Kuvend, më 5 tetor.
Sipas kreut të shtetit, kthimin për rishqyrtim do ta bëjë për t’i dhënë një mundësi tjetër Kuvendit që të mos minojë procesin e ardhshëm zgjedhor. “Kënaqësi të takohesha me Komisionerin për Politikën e Fqinjësisë Europiane dhe Negociatat e Zgjerimit, z. Oliver Varhelyi. E falënderova për të gjitha përpjekjet e tij dhe të institucioneve europiane për të mbështetur integrimin europian të Shqipërisë. Duke u ndalur te Reforma Zgjedhore, përcaktuar si kusht themelor për nisjen e negociatave të anëtarësimit, e informova Komisionerin se do të rikthej për rishqyrtim në Kuvend ndryshimet e njëanshme të Kodit Zgjedhor. Duke mirëkuptuar kërkesën dashamirëse të Grupit të PPE- së në Parlamentin Europian, për t’i dhënë edhe një mundësi Kuvendit njëpartiak të tërhiqet nga minimi i procesit zgjedhor, me pasoja të rënda e afatgjata ndaj integrimit europian të Shqipërisë, uroj që pushteti të kthehet te Marrëveshja konsensuale e 5 Qershorit”, thuhet në statusin e Presidentit Meta në “Facebook” pas takimit me Komisioneri e KE- së. Sipas kreut të shtetit, çdo zgjidhje do të vijë përmes zgjedhjeve të 25 prillit, të cilat Meta i cilëson një referendum popullor. “E garantova Komisionerin Varhelyi se çdo zgjidhje do të vijë nga populli shqiptar. 25 Prilli do të jetë një referendum popullor që do t’u japë përgjigjen e merituar të gjithëve atyre që tentojnë të luajnë me të ardhmen europiane të vendit”, shkruan Presidenti Meta. Gjatë paradites së djeshme, nga Elbasani, kreu i shtetit i bëri thirrje maxhorancës që të reflektojë për Kodin Zgjedhor. Sa i takon çështjes së zgjedhjeve, është një shqetësim i përgjithshëm në vendin tonë dhe i vetë BE- së, i cili mezi pret çeljen e negociatave dhe plotësimin e disa detyrimeve. Le të punojmë të gjithë në shërbim të kësaj bashkëjetese, ka ende kohë për të reflektuar që secili do të jetë pjesë e kontributit të Shqipërisë Europiane që është jo vetëm një objektiv, por do të jetë një realitet i pashmangshëm, pavarësisht sfidave dhe vështirësive”, tha Presidenti Meta.
E garantova Komisionerin Varhelyi se çdo zgjidhje do të vijë nga populli shqiptar. 25 Prilli do të jetë një referendum popullor që do t’u japë përgjigjen e merituar të gjithëve atyre që tentojnë të luajnë me të ardhmen europiane të vendit