Basha me Komisionerin e KE: U shkel Kushtetuta me Reformën Zgjedhore
Kryetari i Partisë Demokratike, Lulzim Basha, në takimin me Komisionerin për Zgjerimin e BEsë, Oliver Varhelyi, e informoi për votimin në Parlament të ndryshimeve në Kodin Zgjedhor. Sipas Bashës, për herë të parë u shkelën praktikat konsensuale. “Me Komisionerin e Zgjerimit diskutuam dhe për Reformën Zgjedhore të miratuar në mënyrë të njëanshme dhe që shembi themelet, mbi të cilat u arrit marrëveshja e 5 qershorit. Gjatë bisedës i bëra të ditur zotit Varhelyi se Reforma Zgjedhore është ndryshuar dhe miratuar në mënyrë të njëanshme, në shkelje të Kushtetutës. PS, duke e ditur se ndryshimet janë në kundërshtim me praktikat e mira të zgjedhjeve, refuzoi marrjen e mendimit të OSBE/ ODHIR. Për herë të parë, në Shqipëri u shkelën praktikat konsensuale, mbi të cilat janë kryer reformat zgjedhore deri më sot. Ky akt cenon rëndë standardin e zgjedhjeve, të cilat janë kusht i rëndësishëm për të ardhmen dhe integrimin e vendit”, shkruan Basha në një postim të tij pas takimit me Komisionerin e Zgjerimit. Kryedemokrati bën të ditur se ka informuar Komisionerin Varhelyi për situatën e vështirë ekonomike dhe korrupsionin, që, sipas tij, “po i varfëron gjithnjë e më shumë shqiptarët dhe po mban larg investitorët e huaj”. “Pata kënaqësinë të pres sot Komisionerin Europian për Zgjerimin, Oliver Varhelyi. Pasi e falënderova për ndihmën e jashtëzakonshme që BE i ka dhënë Shqipërisë për përballimin e pasojave të tërmetit dhe të pandemisë, e informova për situatën tejet të vështirë ekonomike dhe korrupsionin që po i varfëron gjithnjë e më shumë shqiptarët dhe po mban larg investitorët e huaj. Në këtë situatë të vështirë, ndihma e BE- së është jetike për të rritur mirëqenien dhe mbështetur sipërmarrjen”, shkruan Basha. Në përfundim, kryedemokrati thekson se e ka siguruar Komisionerin për Zgjerim “se për Partinë Demokratike dhe Opozitën e Bashkuar mbetet prioritet integrimi europian i Shqipërisë dhe krijimi i mundësive për shqiptarët që të jetojnë si europianë në vendin e tyre”.