Calavera: Të ndalen sulmet e padrejta ndaj vetingut Oliver Varhelyi: BE mbështet fuqimisht procesin e verifikimit
Komisioneri i Zgjerimit në BE, Oliver Varhelyi, i shoqëruar nga shefja e ONM- së, Genoveva Ruiz Calavera, zhvilloi dje një takim me anëtarët e Komisionit të Vetingut, duke iu dhënë atyre mbështetje në misionin e tyre. Nuk kanë munguar pas këtij takimi mesazhet e forta nga ndërkombëtarët në mbështetje të procesit të vetingut, që po bëhet në kuadër të Reformës në Drejtësi. Në një reagim në "Twitter", Genoveva Ruiz Calavera ka dhënë mesazhin e qartë të saj, ndërsa bëri thirrje që të ndalen sulmet e padrejta ndaj disa anëtarëve të vetingut. "Vizitë e rëndësishme në institucionet shqiptare të vetingut me Komisionerin OliverVarhelyi. Vetingu vazhdon me të njëjtin profesionalizëm dhe përkushtim për të siguruar që Reforma në Drejtësi të japë më të mirën për qytetarët shqiptarë. Sulmet e padrejta duhet të ndalen", shkruan Calavera. Ndërkohë, Komisioneri i Zgjerimit, Oliver Varhelyi, shkroi se BE mbështet fuqimisht procesin e verifikimit, i cili është thelbësor për integrimin e Shqipërisë. "Takim shumë i mirë me anëtarët e institucioneve të vetingut. Unë përgëzoj profesionalizmin dhe punën e tyre të palodhur. # EU mbështet fuqimisht procesin e verifikimit, i cili është thelbësor për ta sjellë Shqipërinë më pranë BE- së. Reforma në Drejtësi duhet të vazhdojë", shprehet Varhelyi. Në 28 shtator të këtij viti, shoqata "Drejtësi për Drejtësinë" kallëzoi në SPAK anëtaren e KPK- së,
Brunilda Bekteshin. Sipas kësaj shoqate, Bekteshi, gjatë ushtrimit të detyrës, ka kryer disa vepra penale. Në raportin vjetor të Komisionit Europian për Shqipërinë, të publikuar dy ditë më parë, vlerësohet roli i procesit të vetingut të gjyqtarëve. "Rivlerësimi i përkohshëm i të gjithë gjyqtarëve dhe prokurorëve ( procesi i vetingut) ka përparuar në mënyrë të qëndrueshme, duke vazhduar të prodhojë rezultate të prekshme, si dhe duke përmbushur kështu kushtin për Konferencën e parë Ndërqeveritare. Nën kujdesin e Komisionit Europian, Operacioni Ndërkombëtar i Monitorimit ka vazhduar ta mbikëqyrë procesin. Deri tani janë përpunuar më shumë se 286 dosje, duke çuar në 62% shkarkime, kryesisht për çështje që lidhen me pasuri të pajustifikuara apo dorëheqje. Gjatë periudhës së izolimit nga COVID- 19, institucionet e vetingut kanë vazhduar të kryejnë një numër aktivitetesh të rëndësishme hetimore në distancë. Institucionet e vetingut rifilluan dëgjimet publike në qershor 2020", thuhet në raportin vjetor të Komisionit Europian për Shqipërinë.