Pagat e administratës përplasin Metën me Ramën
Meta: Nga 2006- 2013 pagat u rritën 3 herë më shumë se nga 2013- 2020
Paga e punonjësve të administratës publike është bërë arsyeja e radhës e përplasjes së kreut të shtetit Ilir Meta me kreun e qeverisë Edi Rama. Ky i fundit, për të treguar se sa shumë janë rritur pagat në administratë, kujtoi vetëm shtimin e buxhetit të fondit. Por pas këtyre deklaratave të Kryeministrit reagoi Presidenti Meta përmes një postimi në “Facebook”. Në statusin e tij, Meta shkruante se ose kreu i qeverisë nuk kupton nga ekonomia, ose gënjen. Ndërkohë i kujton se rritja e fondit të pagave nuk nënkupton automatikisht rritjen e buxhetit në xhepin e një punonjësi. “Pyetjes a janë rritur pagat, Kryeministri i përgjigjet me një krahasim të fondit të pagave, që në fillim të vitit 2021 krahasuar me vitin 2006, fondi i pagave pritet të kalojë nga 45.5 miliard lekë, në 71.1 miliard lekë, ose një rritje 56%. I kujtojmë se është një fatkeqësi që Kryeministri i vendit ose nuk e njeh ekonominë, ose gënjen. Fondi i pagave nuk është tregues për rritjen e pagave”, shkroi Meta. Ndërkohë më tej, Kryeministri bëri edhe një krahasim të rritjes së pagës në dy qeveritë. Në qeverinë e Berishës nga 2006 në 2013 dhe nga 2013 në 2020, kur në qeveri është Kryeministri Rama. “Zoti Kryeministër, sipas të dhënave të INSTAT, paga mesatare në sektorin shtetëror në vitin 2006 është 28822 lekë, ndërsa në vitin 2013 arrin në 52150 lekë ose një rritje prej 81% me një rritje vjetore mesatarisht 11.6%, ndërsa në tremujorin e dytë të vitit 2020 paga mesatare arrin në 63826 lekë, një rritje krahasuar me vitin 2013, në 22%, me një rritje mesatare vjetore prej 3.1%. Pra, si shikohet, pagat janë rritur mesatarisht për çdo vit 3.7 herë më shumë në periudhën 2006- 2013, krahasuar me periudhën 2013- 2020. Qytetarët shqiptarë meritojnë transparencë maksimale dhe jo mashtrime elektorale!”, përfundoi reagimin e tij Presidenti Meta, i cili ditët e fundit ka ngritur tonet karshi qeverisë, pasi maxhoranca miratoi në parlament pa konsensus ndryshimet në Kodin Zgjedhor.