Qeveria ndryshon vendimin, procedurat e reja për regjistrimin e tokave me 7501
Dokumentet që duhet të dorëzohen nga qytetarët. Kadastra ka 30 ditë afat për përfundimin e procedurave
Është një fakt që pjesa dërrmuese e titujve të pronësisë të dhënë ndër vite për tokën bujqësore me 7501 nuk janë regjistruar nga Hipoteka.
Një ngërç i mbartur në dekada që vazhdon të trazojë jo pak qytetarët. Në mbledhjen e djeshme, qeveria ka marrë vendimin “Për përcaktimin e procedurave të hollësishme të regjistrimit të titujve të pronësisë që nuk kanë të përcaktuar sipërfaqen”. Me anë të këtij vendimi janë përcaktuar rregullat e reja që do të aplikohen për titujt e paregjistruar, të cilët nuk e kanë të shënuar sipërfaqen, jo vetëm në zonat ku regjistrimi fillestar nuk ka nisur, por edhe aty ku ky proces ka përfunduar. “Për pasuritë e paluajtshme që kanë tituj pa sipërfaqe të përcaktuar, por që ndodhen në zona kadastrale për të cilat ka përfunduar regjistrimi fillestar përpara hyrjes në fuqi të këtij vendimi, merren të mirëqena sipërfaqja dhe kufijtë e tyre, të pasqyruar sipas regjistrimit fillestar, pavarësisht mangësive në procedurë, dokumentacion dhe formë në raport me ligjin e kohës”, theksohet në vendim, duke garantuar kështu se nuk do të ketë cenim të sipërfaqes së fituar nga ky proces.
PËR ÇDO KATEGORI
Nisur nga zona kadastrale ku bën pjesë pasuria, janë përcaktuar edhe dokumentet që duhet të dorëzohen. Kështu, kur toka ndodhet në zonat ku nuk është kryer regjistrimi fillestar, duhet që qytetarët të dorëzojnë informacion jo vetëm për pronën që do të regjistrohet, por edhe për pronat kufitare, dokumente hartografike ndihmëse, aktin e verifikimit në terren dhe deklaratat noteriale të pronarëve kufitarë, që vërtetojnë përmbajtjen e kërkesës për kufijtë e pasurisë që pretendohet të regjistrohet. Ndërsa në zonat ku regjistrimi fillestar ka përfunduar, kërkesa duhet të shoqërohet me titullin e pronësisë, plan- vendosjen, plan- rilevimin dhe deklaratat noteriale të pronarëve kufitarë, që vërtetojnë përmbajtjen e kërkesës për kufijtë e pasurisë që pretendohet të regjistrohet.
PROCEDURAT
Vendimi përcakton që drejtoria vendore e ASHK- së, brenda 30 ditëve nga data e paraqitjes së kërkesës, shqyrton kërkesën dhe dokumentacionin e paraqitur, duke u shprehur me vendimmarrje. “Në rast se gjatë shqyrtimit të kërkesës drejtoria vendore e ASHK- së konstaton se kërkesa shoqërohet me të meta, njofton kërkuesin për plotësimin e tyre brenda afatit 10- ditor. Në rast të mosplotësimit të të metave brenda afatit, drejtori vendor del me vendim mbi mospranimin e kërkesës”, theksohet më tej në vendim, ku qartësohet po ashtu se kur ka pretendime për kufijtë midis pronarëve të dy apo më shumë pasurive, që kanë tituj me sipërfaqe të papërcaktuar, sipas pikave të mësipërme, mosmarrëveshja zgjidhet në rrugë gjyqësore.