I dënuar në Itali për trafik droge, 47- vjeçari kapet në Fushë- Krujë

Një 47- vjeçar është arrestuar nga Komisariati i Policisë Fushë- Krujë, i cili rezultonte i shpallur në kërkim nga autoritetet italiane. Ai akuzohej për trafikim të lëndëve narkotike dhe ishte dënuar në mungesë me 10 vjet burgim. Agim ( Artur) Likaj, 47 vjeç, banues në fshatin Arrameras, Fushë- Krujë u vu në pranga teksa qëndronte i fshehur në fshatin e tij. Mësohet se 47- vjeçari ishte i shpallur në kërkim ndërkombëtar nga autoritetet italiane, pasi Gjykata e Milanos, Itali, më datë 10.09.2020, e ka dënuar me 10 vjet burgim, për veprën penale “Pjesëmarrja në organizatë kriminale për trafikimin e lëndëve narkotike”, parashikuar nga Kodi Penal italian. “Shërbimet e Komisariatit të Policisë Krujë, pas informacioneve të marra nga Departamenti i Policisë Kriminale dhe Interpol Tirana për një shtetas të shpallur në kërkim ndërkombëtar që fshihej në Krujë, kanë organizuar punën për kapjen e tij. Shërbimet e Policisë Krujë, bazuar dhe në informacionet e marra në rrugë operative për vendndodhjen e shtetasit të kërkuar, bënë të mundur kapjen dhe arrestimin e 47vjeçarit, me qëllim ekstradimi drejt Italisë”, deklaroi Drejtoria e Policisë, Qarku Durrës, e cila tha se në këtë operacion agjentët u mbështetën nga Interpol Tirana dhe efektivë të Policisë së Krujës që kanë siguruar vendndodhjen e shtetasit Agim ( Artur) Likaj, i shpallur në kërkim ndërkombëtar. Mësohet se 47- vjeçari ndodhej në Shqipëri prej disa vitesh dhe fshihej në zonën e Arramerasit në Fushë- Krujë, duke shmangur në këtë mënyrë edhe vuajtjen e dënimit në shtetin fqinj. Tashmë, Agim Likaj, i cili ka ndryshuar edhe emrin do të paraqitet për masë sigurie në Gjykatën e Krujës, e cila do të vendosë edhe datën e ekstradimit drejt shtetit fqinj ku pritet të vuajë dënimin e caktuar nga Gjykata e Milanos për veprat penale “Pjesëmarrja në organizatë kriminale për trafikimin e lëndëve narkotike”, parashikuar nga Kodi Penal italian. L. M