Gara në universitete, afati i fundit për të aplikuar

Rihapet portali i maturës, aplikimet online nga ora 09: 00- 02: 00

Pa përfunduar ende regjistrimet e studentëve në raundin e dytë, Ministria e Arsimit bën ftesën e fundit për të rinjtë që duan t'i bashkëngjiten garës për të plotësuar vendet e lira në raundin e tretë dhe të fundit të regjistrimeve në universitete.

Për të disatën herë, Ministria e Arsimit ka rihapur portalin e maturës shtetërore, duke i dhënë mundësi kujtdo që nuk i është futur konkurrimit për në IAL- të publike apo private.

AFATI Vetëm pesë orë afat. Qendra e Shërbimeve Arsimore ka njoftuar që një ditë më përpara hapjen e portalit të aplikimeve gjatë ditës së sotme, vetëm për një interval të shkurtër kohor. Kështu, çdo i ri, qoftë maturant i sivjetmë apo i viteve të kaluara që mendonte se e kishte humbur mundësinë për t'u bërë student, tanimë mundet. Mjafton të adresohet në shkollën ku ka përfunduar studimet e mesme për të plotësuar formularin përkatës që i hap rrugë aplikimit për në universitet. "Njoftohen të gjithë maturantët/ kandidatët që nuk kanë aplikuar me Formularin A1/ A1Z në Portalin Matura Shtetërore 2020, se portali i maturës shtetërore online do të hapet për aplikime në datën 8 tetor, nga ora 09: 00 deri në orën 14: 00. Plotësimi online i Formularit A1/ A1Z do të kryhet në shkollat ku maturantët/ kandidatët kanë kryer arsimin e mesëm të lartë ose në shkollën e përcaktuar nga KMSH- ja e vendbanimit, nëse shkolla e mesme që kanë përfunduar është mbyllur", thuhet në njoftimin e firmosur një ditë më parë nga drejtoresha e QSHA- së, Rezana Vrapi. Ky është vetëm hapi i parë. Për t'u futur në auditor universiteti, aplikuesit e fundit do të duhet të konkurrojnë për vendet e fundit në to. Për raundin e tretë, kanë afat edhe katër ditë për të kryer pagesën e tarifës së aplikimit, ndërsa ky i fundit realizohet përgjatë tri ditëve, 12, 13 dhe 14 tetor ( sipas kalendarit të datave bashkëngjitur shkrimit). Vetëm pesë ditë më vonë do të marrin vesh nëse kanë fituar, ndërsa regjistrimet do të kryhen në pesë ditët e fundit të muajit. Gjithçka presupozohet të mbyllet brenda tetorit, pasi në datën 2 të muajit pasardhës është caktuar fillimviti i ri akademik.