Pasojat e tërmetit, dosjet e rindërtimit drejt fundit
Veliaj: Do të mbyllim 100% dosjet e tërmetit të nëntorit
Vetëm pak javë përpara se të bëhet një vit nga tërmeti i 26 nëntorit, Bashkia e Tiranës, një ndër më të prekurat nga tërmeti, po përpiqet të ketë një bilanc të plotë të atyre që kanë mbetur pa shtëpi me qëllim për t'ua rindërtuar. Nga Njësia 4 në kryeqytet, kryetari i Bashkisë, Erion Veliaj, kërkoi mbylljen e dosjeve në këtë zonë dhe të gjithë të pastrehët të përfshihen në planin e rindërtimit. "I mbyllim dosjet! I marrim vendimet! Po t'i lëmë për vitin tjetër, do thonë: Po i bëjnë për fushatë, jo po se kanë interes tani, jo se duan t'i mbajnë njerëzit varur. Ne nuk jemi ai lloj race, nuk mbajmë asnjeri varur. Siç mbyllëm 100% tërmetin e shtatorit, do të mbyllim 100% edhe të nëntorit. Nëse ata kanë gjetur 6 spekulantë në 6000 dosje, do të thotë 1 në 1000; pra, 999 të tjerët janë realisht nevojtarë që po ndihmohen, janë mirënjohës, janë njerëz të drejtë, që e duan rendin, që respektojnë faktin se komuniteti po i ndihmon", bëri me dije Veliaj, duke zbuluar edhe një detaj nga projekti për rindërtimin. Ato do të projektohen nga arkitekti i njohur italian, Stefano Boeri, ideator dhe projektues i shumë projekteve të tjera në vend. Edhe dje, Veliaj nënvizoi se familjet, shtëpitë e të cilave do të rindërtohen nga e para falë qeverisë, do të kenë një vlerë më të lartë në treg. E po ashtu do të jenë falas, ndryshe nga vende të tjera në botë ku funksionojnë sigurimet shoqërore. RIPARIMET DHE RINDËRTIMET Me mbylljen e ciklit të kompensimeve për tërmetin e 21 shtatorit të vitit që lamë pas, fokusi i punës së bashkisë është në dëmshpërblimet e familjeve pas tërmetit të 26 nëntorit. Nga 11 mijë aplikime për para kesh, deri tani janë ndarë diçka më shumë se gjashtë mijë. Disa ndryshime në udhëzimin e kompensimeve kanë përjashtuar një mijë familje, shtëpitë e të cilëve janë dëmtuar, ndërsa pritet miratimi i listave për 4 mijë përfituesit e mbetur. Në mbledhjen e Këshillit Bashkiak të javës që shkoi, në arkën e bashkisë ka kaluar fondi shtesë i qeverisë për rikonstruksionet dhe riparimet. Ngelet vetëm dërgimi për miratim në këshill i listëpagesave dhe kalimi i parave te familjet takuese. Sa i takon rindërtimit, puna ka nisur për banesat individuale në lagjet e reja të Tiranës. Për 21 pallate në Njësinë Administrative Nr. 6, është marrë vendimi për shembje, ndërsa ka ende pallate, për të cilat nuk ka një vendimmarrje finale. Në total, në kryeqytet mësohet të jenë rreth 100 pallate që kanë pësuar dëmtime të konsiderueshme.