Operacion antidroge në Itali, kapet në Vlorë një 26- vjeçar
Operacioni “Ricavo” kundër narkotikëve, 9 të arrestuar
Finalizohet një tjetër operacion ndërkombëtar antidrogë për goditjen e një grupi kriminal në fushën e narkotikëve.
Operacioni policor i koduar “Ricavo” u zhvillua nga Policia italiane, në bashkëpunim me Policinë e Shtetit, për ekzekutimin e 9 urdhërarresteve të lëshuara nga Prokuroria e Arezzo- s. Ky operacion u koordinua dhe zhvillua njëkohësisht në vendin tonë dhe në Itali. Në Shqipëri u kap një prej personave të kërkuar, ndërsa 8 të tjerët u kapën në Itali. Policia e Shtetit tha dje se në orët e para të mëngjesit të djeshëm, si rezultat i bashkëpunimit mes Interpol Tiranës, Departamentit të Policisë Kriminale, Policisë së Vlorës dhe Zyrës së Oficerëve Ndërlidhës në Ambasadën Italiane ( misioni Interfoza), u zhvillua operacioni policor i koduar “Ricavo”.
ARRESTIMET Në zbatim të urdhërarresteve të lëshuara nga zyra e Prokurorisë e Arezzo- s dhe si rezultat i veprimeve policore të mirëkoordinuara mes palëve, u arrestuan në Itali 8 persona ( shtetas italianë), ndërsa në vendin tonë u arrestua nga Policia e Vlorës, me qellim ekstradimin drejt Italisë, shtetasi shqiptar me iniciale R. B., 26 vjeç. Operacioni “Ricavo”, i iniciuar nga strukturat e Karabinierëve të San Gionavvi Valdarno dhe Prokuroria në Arezzo, Itali, pati si qëllim goditjen e një grupi të organizuar kriminal, të përbërë kryesisht nga shtetas italianë dhe shqiptarë, me aktivitet trafikimin ndërkombëtar të narkotikëve. Vazhdojnë veprimet hetimore për dokumentimin e plotë të veprimtarisë së paligjshme të këtij grupi të strukturuar kriminal. “Edhe në finalizimin e këtij operacioni, Policia e Shtetit tregoi vendosmërinë dhe besueshmërinë për të luftuar e goditur pa kompromis, në bashkëpunim me homologët, krimin e organizuar dhe garanton qytetarët se është tërësisht e vendosur për të përmbushur misionin e saj në funksion të garantimit të rendit e sigurisë së jetës dhe pronës së qytetarëve dhe i fton ata të denoncojnë në numrin 112 e Komisariatin Dixhital çdo paligjshmëri”, tha dje zyrtarisht Policia e Shtetit. “Karabinierët në Arezzo, me ndihmën e një qeni antidrogë, me bashkëpunimin e stafit të Shërbimit për Bashkëpunimin Policor Ndërkombëtar të Ministrisë së Brendshme dhe forcave të Policisë shqiptare, me urdhër të Prokurorisë Publike në Gjykatën e Arezzos, ka kryer 9 arrestime paraprake, nga të cilat 6 persona kanë pasur masën ‘ Arrest me burg’ dhe 3 të tjerë ‘ Arrest në shtëpi’. Ata akuzohen për trafikim të sasive të mëdha të drogës, të llojit kokainë dhe marijuanë. Me ndihmën e qenit, Policia ka kryer kontrolle për armë në 11 subjekte, lokale e banesa”, shkruanin dje mediat italiane.