Pandemia e rriti pasurinë e miliarderëve me 27 për qind
Ndërkohë që raportet e institucioneve më të mëdha financiare botërore paralajmërojnë se rreth 150 milionë njerëz do të vuajnë nga uria për shkak të Covid- 19, pandemia ka ndikuar në rritjen rekorde të pasurisë së miliarderëve. Sipas një raporti të bankës zvicerane "UBS", personat më të pasur në botë kanë regjistruar rritje prej 27.5 për qind apo 10.2 trilionë dollarë amerikanë pasuri, nga prilli deri në korrik të këtij viti. Banka zvicerane ka thënë se miliarderët kanë pasur periudhë "jashtëzakonisht të mirë" gjatë krizës pandemike. Po ashtu, në raport thuhet se numri i miliarderëve ka arritur një rekord të ri, me 2,189 nga 2,158 sa kanë qenë më 2017ën. Përfituesit më të mëdhenj të këtij viti kanë qenë industrialistët, pasuria e të cilëve është rritur për 44 për qind gjatë pandemisë. Miliarderët e teknologjisë po ashtu janë përballur me periudhë të mirë, meqë pasuria e tyre është rritur për 41 për qind. "UBS" thotë në raport se për "shkak që koronavirusi ka nxitur kërkesa të reja për mallra dhe shërbime" dhe duke marrë parasysh distancën fizike, bizneset dixhitale kanë shkurtuar periudhën e zhvillimit nga disa vjet në disa muaj. Miliarderët e fushës së kujdesit shëndetësor po ashtu kanë përfituar, meqë kriza ka kthyer vëmendjen te kompanitë e prodhimit të ilaçeve dhe pajisjeve mjekësore.
Shefi i "Amazon", Jeff Bezos, dhe themeluesi i kompanisë "Tesla", Elon Musk, kanë regjistruar rekorde të reja pasurie, kryesisht për shkak të rritjes së çmimeve të aksioneve të kompanive që drejtojnë.