Ngociatat, Soreca: Duhen dënime të zyrtarëve të lartë
“Korrupsioni mbetet i përhapur në Shqipëri, shqetësim serioz”
Në mbledhjen e Këshillit Kombëtar të Integrimit, shefi i delegacionit të BE- së në Shqipëri, Luigi Soreca, ka dhënë mesazhe të forta për ecurinë e procesit te negociatave. Diplomati europian bëri thirrje për më shumë vendosmëri në luftën ndaj korrupsionit dhe se duhet që organet e reja të gjyqësorit sa më parë të vënë para drejtësisë zyrtarë të lartë të implikuar në raste korrupsioni, por edhe vepra të tjera kriminale.
SISTEMI I DREJTËSISË Sipas ambasadorit Soreca, sistemi shqiptar i drejtësisë ka treguar përmirësime, por duhet shumë punë dhe bërja funksionale e Gjykatës Kushtetuese brenda këtij viti është një kusht i palëvizshëm. “Sistemi gjyqësor i Shqipërisë është fusha ku kemi parë më shumë progres gjatë vitit të kaluar, me zbatimin e reformës në drejtësi që vazhdon pa u ndalur. Këshilli i Lartë Gjyqësor përfundoi zgjedhjen e tre kandidatëve për Gjykatën e Lartë. Rezultati përfundimtar është që njëra nga dhomat e Gjykatës të funksionojë ( kusht për Konferencën e parë Ndërqeveritare). Kjo siguron bazën që Gjykata Kushtetuese të rifitojë funksionalitetin. Në dhjetor 2019, Gjykata kishte një gjyqtar në detyrë, tani ka katër anëtarë. Megjithatë, emërimi i gjyqtarëve shtesë mbetet thelbësor për të pasur një Gjykatë Kushtetuese plotësisht funksionale. Prokurori i ri i Përgjithshëm u emërua për herë të parë bazuar në procedurat e vendosura nga reforma e fundit në drejtësi. Për luftën kundër korrupsionit, komisioni vlerëson se Shqipëria ka njëfarë niveli përgatitjeje. Megjithatë, korrupsioni mbetet i përhapur në Shqipëri dhe është një shqetësim serioz. Ai kërkon përpjekje të mëtejshme, të strukturuara dhe të qëndrueshme. Dënimet përfundimtare në rastet ku përfshihen zyrtarë të nivelit të lartë mbeten shumë të ulëta. Për këtë, kemi shumë shpresa që SPAK do ta forcojë ndjeshëm kapacitetin për ta hetuar dhe ndjekur penalisht korrupsionin”, tha Soreca.
NIVELI I KORRUPSIONIT Ndërsa për çështjen e korrupsionit, diplomati italian u tregua shumë i qartë, teksa theksoi se duhen dënime dhe shembuj konkretë të kësaj lufte nga Shqipëria. “Për luftën kundër krimit të organizuar: Shqipëria gjithashtu ka njëfarë niveli përgatitjeje. Sidoqoftë, vendi ka nevojë për rritje të ndjekjeve penale dhe dënime përfundimtare, si dhe për trajtimin e çështjes së pastrimit të parave dhe konfiskimin e pasurive që burojnë nga krimet. Komisioni ka vlerësuar se Shqipëria i ka vazhduar përpjekjet e saj për reforma, të cilat duhet të vazhdojnë edhe në një periudhë parazgjedhore. Shqipëria tani është pranë përmbushjes së të gjitha kushteve që duhen plotësuar para Konferencës së parë Ndërqeveritare. Shpresojmë që Konferenca e parë Ndërqeveritare të mund të thirret sa më shpejt që të jetë e mundur”, deklaroi ambasadori i BE- së.