“Ata që hiqen nga anëtarësia, në administratë qeverisëse”
Mustafaj: Në fazën e tretë vlerësojmë pa u ndikuar nga anëtarësia
Faza e votimit në anëtarësi të kandidatëve për të qenë pjesë e listës së PD në zgjedhjet e ardhshëm nuk i ka shmangur pakënaqësitë në mesin e demokratëve. Por anëtari i komisionit të Vlerësimit në PD, Besnik Mustafaj, në një intervistë për “News 24” u shpreh se nuk ka term skualifikim në fazën e votimit. Duke synuar sheshimin e pakënaqësive, Mustafaj theksoi se ata që kontestohen nga anëtarësia, nuk kanë të drejtë që të kandidojnë për deputetë ose kryetar bashkie, por do të jenë në listën e dytë që do të përbëjë administratën politike të qeverisë së ardhshme të PD- së. “Në listën e përfaqësimit politik, jo. S’besoj që Kryesia të dalë kundër vullnetit të demokratëve. Janë njerëz me kontribute demokratike, do të jenë në listën 2. Përderisa kanë shkuar në atë fazë, dhe do jenë shumë të preferuar në emërimet politike kur opozita të vijë në pushtet. Përjashtohet termi skualifikim. Lista e dytë është automatike”, tha Mustafaj. Më tej Mustafaj theksoi se ky proces duhet analizuar drejt. Duke iu referuar rastit të qarkut të Korçës, ku vetëm Ervin Salianji u konfirmua nga lista e deputetëve të vitit 2017, Mustafaj tha se mbase anëtarësia do rifreskim si në pushtetin lokal, ashtu edhe në atë qendror. “Ka pasur në shumë qarqe skualifikime. Anëtarësia e PD- së po bën një proces demokratik përderisa ka vota pozitive dhe negative. Një pjesë e 2017ës ka rënë, disa prej të zgjedhurve atëherë janë skualifikuar”, vijoi Besnik Mustafaj. Ndërsa rastet e përplasjeve në anëtarësi Mustafaj thotë se i bëjnë mirë Partisë Demokratike, sepse angazhohen anëtarët. Përplasje në degët e PD- së ka pasur vetëm në Devoll. Luftë për pushtet është, bën mirë. I angazhon njerëzit, i ballafaqon për ata që marrin poste, i ballafaqon me komunitetin. Në këtë kuptim, i bën mirë”, tha Mustafaj.
FAZA E TRETË Konfirmimi nga ana e anëtarësisë i emrave në qarqe nuk nënkupton se ata do të jenë automatikisht në listë. Pasi të përfundojë votimi në Tiranë ditën e shtunë, procesi hyn në fazën e tretë të vlerësimit nga ana e komisionit. “Kemi një fazë të tretë, do të jenë 350 të përzgjedhur, ne do të bëjmë një krehje të vogël dhe këta do t’i nënshtrohen një gjykimi tjetër. Edhe ne përtej votimit që i kemi bërë si Komision, do t’i skualifikojmë. S’do vlerësohet kandidati nga votimi i anëtarësisë, por në gjykimin tonë. Kandidatët mund të kenë pasur kundërshtimet me njërin apo tjetrin, por jo në masën që të skualifikohesh, janë pjesë e demokracisë. Do nisemi nga vlerësimi ynë”, tha Mustafaj.