Mandija: Në arbitrazh, njerëz në konflikt interesi
“BKH dhe SPAK kanë detyrimin të hetojnë proceset”
Ish- avokatja e shtetit Ledina Mandija akuzoi dje Kryeministrin Edi Rama se që kur erdhi në pushtet, përveçse zbatoi një axhendë armiqësore me bizneset, ndërmori edhe një veprim tjetër që ka dëmtuar shtetin. Përmes një postimi në “Facebook”, ish- avokatja e shtetit u shpreh se në krye të institucioneve shtetërore të arbitrazhit u vendosën persona në konflikt interesi, që nuk kanë ndihmuar vendin, por e kanë dëmtuar. “Qeveria emëroi në strukturat shtetërore të arbitrazhit individë në konflikt të pastër interesi, që nuk mbrojtën interesat e shtetit. Zyrtarë të lartë e shfrytëzuan arbitrazhin ndërkombëtar si një mundësi që do të përmbyllte çdo negociatë korruptive, çdo zgjidhje kontrate, heqje licence në shkelje të ligjit”, shkroi Mandija. Po ashtu, Mandija akuzon qeverinë se nuk ka bërë transparencë me çështjet në gjykatat e arbitrazhit. Ajo tha se Avokatura e Shtetit nuk u ka kthyer përgjigje deputetëve dhe Presidentit. “Qeveria në asnjë rast nuk bëri transparencë për çështjet e arbitrazhit, duke e justifikuar me mburojën e ‘ konfidencialitetit’. ASH- ja deklaroi publikisht se klient kishte veç ‘ shtetin’ dhe u mohoi të drejtën e informimit deputetëve dhe Presidentit”, vijoi Mandija.
GJYQET E HUMBURA Duke përgënjeshtruar deklaratën e dy ditëve më parë të Kryeministrit Edi Rama se deri tani shteti shqiptar nuk ka humbur asnjë gjyq në arbitrazh, ishavokatja e shtetit në qeverinë tranzitore të vitit 2021 i kujtoi Kryeministrit disa prej gjyqeve të humbura. “Kryeministri sot pretendon se nuk ka asnjë çështje të humbur, ndërkohë që ka disa të tilla të bëra publike nga vetë kompanitë gjyqfituese. Pa negociata, pa praninë e avokatëve ndërkombëtarë të kontraktuar, si dhe duke shpërfillur vlerësimet financiare të përgatitura nga ekspertë ndërkombëtarë të paguar me paratë e taksapaguesve, përmes një marrëveshjeje të paligjshme, të certifikuar në Parlament, në korrik të 2014- ës u paguan 95,5 milionë euro për ‘ ÇEZ. as’, iu falën 320 milionë euro detyrime dhe 500 milionë euro dëmshpërblim, i vlerësuar nga ekspertët ndërkombëtarë. Në 7 vjet qeverisjeje të Ramës numërohen dështime të tjera në arbitrazh, si ‘ Avax’ me 2,5 milionë euro; ‘ JV’ me 900 000 euro etj.; 250 milionë euro detyrim ndaj ‘ Bankers Petroleum AL’. Lista është shumë e gjatë dhe do t’ia dëgjojmë zërin si në rastin e Bechetti- t dhe ‘ Actor’. Së fundi, një padi e re në vlerë 100 milionë euro u regjistrua në arbitrazh të investimeve, ndërkohë që qeveria nxitoi të lidhë kontratë me një tjetër kompani”, vijoi Mandija. Institucioneve të reja të drejtësisë u kërkoi të bëjnë punën e tyre. “BKH- ja dhe SPAK- u kanë detyrimin të hetojnë në lidhje me të gjitha proceset në arbitrazhin ndërkombëtar, duke filluar nga ndjekja e kontratave, caktimi i arbitrave e avokatëve deri në ekzekutimet përfundimtare të vendimeve të arbitrazhit”, përfundoi ish- avokatja e shtetit.