"Luarasi" mbledh në konferencë online 4 universitete ballkanike
Rektori Ruka: Forcojmë lidhjet mes kërkuesve dhe ekspertëve
Universiteti "Luarasi" ka finalizuar me sukses konferencën e parë shkencore në kuadër të Fondit të Ballkanit Perëndimor ku ishte shpallur fitues i projektit, së bashku me tri universitete nga rajoni.
Në rolin e liderit, "Luarasi" me partnerët e tij prestigjiozë, Universitetin "FON" në Maqedoninë e Veriut, Qendrën e Inovacionit dhe Sipërmarrjes në Universitetin e Zenicës ne Bosnje- Hercegovinë dhe Universitetin "Donja Gorica" në Malin e Zi, arritën të zhvillojnë aktivitetin shkencor virtualisht. Rektori i "Luarasit", profesor Et'hem Ruka, shprehet se kjo konferencë e parë në kuadër të projektit mblodhi lektorë e referues nga Ballkani Perëndimor, punimet shkencore do të përmblidhen në një botim të veçantë, ndërsa komisioni i ngritur do të vlerësojë edhe punimin më të mirë. "Është hera e parë që në rang rajonal ne mblidhemi bashkë; lektorë, kërkues për të referuar në gjashtë fusha të ndryshme. Pavarësisht situatës së vështirë të krijuar nga pandemia COVID- 19, ne në mënyrë virtuale jemi bashkë. Mendoj se është një hap i parë në bashkëpunimin rajonal, i iniciuar nga Universiteti "Luarasi" dhe i financuar nga Fondi i Ballkanit Perëndimor. Ne mendojmë që mos ta lëmë deri këtu, në një konferencë si kjo e sotmja. Të gjitha punimet që do të dorëzohen, do të botohen në një revistë shkencore. Unë besoj se është një konferencë me të vërtetë dinjitoze, një konferencë e realizuar jashtëzakonisht mirë. Universiteti "Luarasi" ka luajtur rolin e liderit.
BASHKËPUNIMI Zëvendësrektorja e Universitetit "Luarasi", prof. Ani Dasho, duke dhënë detaje mbi temën e konferencës, u shpreh se ndër objektivat kryesorë është krijimi i marrëdhënieve solide mes institucioneve të arsimit të lartë në Ballkan, duke ndarë eksperienca dhe duke krijuar histori suksesi. "Ne kemi besim që kjo konferencë e parë, në kuadër të këtij projekti, do të kontribuojë në forcimin e mëtejshëm të bashkëpunimit rajonal, lidhjeve midis kërkuesve shkencorë dhe ekspertëve të fushave të ndryshme në rajonin e Ballkanit Perëndimor, edhe pse në situatë të kushtëzuar nga pandemia COVID- 19. Ndër output- et e kësaj konference do të jenë bashkëpunime shkencore ndërkombëtare me partnerët, një revistë shkencore ndërkombëtare, leksionet e hapura të organizuara në këto universitete dhe workshop- et e organizuara nga zyrat e karrierës në universitetet partnere për të identifikuar dhe informuar studentët për mundësitë reale të punësimit në Rajonin e Ballkanit Perëndimor. Por Universiteti ' Luarasi' nuk ndalet këtu, ambiciet janë për të krijuar bashkëpunime të tjera me institucione prestigjioze të arsimit në Europë dhe SHBA, si dhe po punon me shtetin e Izraelit për të ngritur akademinë e parë kundër luftës kibernetike. "Tani jemi në rrugë të mbarë për të lidhur marrëveshje bashkëpunimi me Universitetin e Arizonës në Shtetet e Bashkuara të Amerikës, praktikisht jemi duke përgatitur draft- marrëveshjen, ashtu siç jemi duke avancuar shumë për të ngritur edhe një akademi e cila do të jetë frat i bashkëpunimit mes Izraelit dhe Shqipërisë, që do të certifikojë specialistët për krimin kibernetik, certifikata të cilat kanë një vlerë ndërkombëtare", bëri me dije Ruka.