Gripi stinor, pse është i rëndësishëm vaksinimi dhe a na mbron nga COVID- 19
Janë 368 mijë doza vaksine kundër gripit stinor, që shumë shpejt do të nisin të shpërndahen në të gjitha qendrat shëndetësore të vendit. Prej fundit të muajit shtator, ka nisur kryerja e vaksinës për personelin shëndetësor. Drejtoresha e Departamentit të Sëmundjeve Infektive në ISHP, Silva Bino, gjatë një komunikimi me gazetarët, vuri theksin në rëndësinë e kryerjes së vaksinës nga të gjithë kategoritë e riskuara, përfshirë fëmijët, moshën e tretë, punonjësit e Policisë. “Është i rëndësishëm për ato grupmoshat që mund të bëjnë infeksione më të rënda ta kryejnë vaksinimin ndaj gripit. COVID s’ka ende vaksinë, por gripi po! Vaksinimi ndaj gripit kryhet në çdo kohë. Këtë vit, synimi ynë është që procesi i vaksinimit të popullatës të përfundojë deri në fund të nëntorit”, tha Bino nga ambientet e Spitalit Infektiv në QSUT, ku prej më shumë se një jave gjendet e shtruar. Doktoresha u ndal edhe në mundësinë e vaksinimit të personave që janë të infektuar nga COVID- 19. Sipas saj, personat që janë prekur nga koronavirusi, mund të vaksinohen për të mos u prekur edhe nga gripi, por kjo duhet të ndodhë pasi ata të jenë negativizuar. “Kur je me COVID, s’mund të vaksinohesh! Por 14 ditë pasi ta kesh kaluar koronavirusin, mund të kryhet vaksinimi”. Në lidhje me asimptomatikët, pra, personat që mund të jenë të infektuar, por nuk shfaqin shenja, Bino tha se në këtë rast është e udhës që para vaksinës të pyetën nëse kanë pasur kontakt me persona të infektuar. Megjithatë, e rëndësishme është që vaksina nuk dëmton, po ashtu duhet thënë se nuk krijon as imunitet për koronavirusin. Ndryshe nga vitet e mëparshme kur vaksinimi kundër gripit për personelin shëndetësor dhe kategoritë fillonte në nëntor, këtë vit ka nisur më herët. Pandemia COVID- 19 ka bërë që autoritet të përshpejtojnë kryerjen e kësaj vaksinë si një masë paraprake për të ulur shkallën e agresivitetit të virusit stinor. Veç kësaj është trefishuar edhe numri i dozave. Një vit më parë u siguruan 138 mijë doza, ndërsa këtë vit 368 mijë. Të parët që do vaksinohen do të jetë mjekët dhe infermierët për të vijuar më pas me fëmijët dhe të moshuarit. Vaksinimi do të jetë një masë parandaluese që këto grupe risku të mos infektohen nga virozat e stinës, meqenëse qarkullojnë paralelisht me COVID- 19. Vaksina do të kryhet për personelin shëndetësor edhe për grupet e tjera të riskut falas, pranë qendrave shëndetësore, sipas një kalendari të përcaktuar nga vetë strukturat e shëndetësisë. Do të jenë mjekët e familjes që do të thërrasin personat e riskuar për kryerjen e vaksinës, sipas parashikimeve.