Kompensimi 100% në para, pronarët që do përfitojnë
Raporti i ATP, në 8 muaj është ndarë vetëm 10% e fondit vjetor
Kur na ndajnë vetëm 3 muaj nga mbyllja e vitit ajo që mund të thuhet është se janë vetëm një numër i reduktuar kërkesash që janë dorëzuar në sportelet e Agjencisë së Pronave dhe një numër i reduktuar pronarësh, që kanë përmbyllur procedurat e kompensimit.
Asgjë nuk ndryshoi as në 2020, ku dukshëm bie në sy interesi tejet i ulët pronarëve për të qenë pjesë e procesit. Nga të dhënat zyrtare rezulton që përgjatë 8 mujorit të parë të këtij viti është ndarë vetëm 10 për qind e fondit vjetor ose rreth 5 milionë dollarë dhe kanë përfituar 189 familje. Ndërkohë që fondi total kap vlerën e 45 milionë dollarëve. “Kompensim financiar janë kompensuar 14 subjekte me vlerë 26,815,240.190 lekë , sipërfaqja e kompensuar fizikisht është 552 962.14 m2, vlera e së cilës është 107 260 960.97 lekë edhe 1 mbyllje procedimi. Janë regjistruar pranë sporteleve 38 aplikime të reja për kompensim financiar / fizik. Kompensim me kërkesë të veçantë gjatë vitit 2020 janë kompensuar 175 subjekte me vlerë 549,234,373.70 lekë dhe 4 mbyllje procedimi”, thuhet në raportin e agjencisë për 8- mujorin e parë të këtij viti, dorëzuar në Ministrinë e Drejtësisë. Numri i ulët i aplikimeve dhe vendimeve të ekzekutuara nga ana e ATP- së është lidhur me situatën e krijuar prej pandemisë. “Gjatë muajit mars - prill ka pasur një bllokim të konfirmimeve nga ana e institucioneve për shkak të situatës së krijuar me infeksionin Covid- 19. Në Periudhën prill - qershor 2020 me hyrjen në fuqi të ligjit nr. 20/ 2020 “Për përfundimin e proceseve në Republikën e Shqipërisë”, në ATP nuk mund të vazhdojnë me shqyrtimin e dosjeve të kalimit në pronësi të oborreve në përdorim, pasi procesi ka kaluar si funksion pranë ASHK”, nënvijëzohet më tej në raport. Kujtojmë që me ndryshimet e bëra prioritet ka marrë kompensimi në pronën e njohur. Pra, për çdo familje të shpronësuar do të shikohet fillimisht mundësia që t’u kthehet një pjesë e tokës që i është konfiskuar. Nëse kjo nuk realizohet, pronarëve iu lind e drejta të kompensohen financiarisht për 20% të vlerës së faturës, por jo më shumë se 10 milionë lekë të reja. Për pjesën e mbetur do të mbulohen nga fondi i tokës që ATP disponon. Përveç kësaj, pronarët kanë të drejtë të zgjedhin edhe skemën e pagesës me këste, pjesëmarrjen në ankand ose kompensimin në masën 100 për qind nga fondi fizik.
Por edhe pse është në fazë draftimi, pra ende nuk është zyrtarizuar, të gjithë pronarët që kanë në duar vendime të formës së prerë më një vlerë që shkon deri në 500 mijë lekë do të kenë mundësi ta përfitojnë të plotë kompensimin. Në ndryshimet ligjore të cilat ende nuk kanë kaluar për miratim në qeveri parashikohet që ato familje me faturë minimale nga 200 mijë deri në 500 mijë të kenë mundësi ta marrin të plotë kompensimin 100 për qind në para.