Azerbajxhani dhe Armenia akuzohen për përdorimin e bombave thërrmuese

Azerbajxhani është akuzuar për përdorimin e bombave thërrmuese në rajonin e shkëputur të Nagorno- Karabakut, përfshirë zonat civile, por po ashtu dhe Armenia u akuzua për përdorimin e të njëjtave armë. Bombat thërrmuese janë të ndaluara sipas konventës për municionet thërrmuese ( CCM), një traktat i nënshkruar nga më shumë se 100 shtete, por jo nga Armenia apo Azerbajxhani. Municionet thërrmuese u përdorën në Nagorno- Karabak në raundin e fundit të luftimeve në vitin 2016 dhe të dyja palët kanë thënë se ata nuk mund të bashkohen në traktat derisa të zgjidhet çështja e Nagorno- Karabakut. Media dhe organizatat e të drejtave të njeriut kanë konfirmuar përdorimin e municioneve thërrmuese M095 të prodhuara nga Izraeli, të cilat shpërndajnë qindra bomba, ose nën municione, në zonat e banuara të Stepanakert, kryeqyteti i Nagorno- Karabakut, i cili është në shënjestër të forcave të Azerbajxhanit. Përdorimi i armëve të ndaluara u dokumentua ndërsa luftimet vazhduan të enjten për të 15- ën ditë radhazi dhe ndërmjetësuesit ndërkombëtarë po përgatiten për negociata që të arrijnë një marrëveshje armëpushimi në Gjenevë. Ka pasur zëra se edhe fuqitë rajonale mund të përfshihen në konflikt. Por Presidenti i Rusisë, Vladimir Putin, e ka bërë të qartë se nuk konsideron të përfshihet në luftimet në Nagorno- Karabak, një rajon i drejtuar nga armenët etnikë, por brenda territorit të Azerbajxhanit. Shumë fuqi botërore, përfshirë Shtetet e Bashkuara, Rusinë dhe Francën, kanë bërë thirrje për armëpushim të menjëhershëm, ndërsa Turqia ka thënë se Azerbajxhani ka të drejtë për vetëmbrojtje dhe ka bërë thirrje që forcat armene të tërhiqen nga zona e konfliktit.