“Fitoret janë detyrim, e vuaj ende humbjen me Lituaninë”

Amir Abrashi krijoi jo pak ankth në ditët e para të grumbullimit. Mesfushori i Fraiburg nuk bëri stërvitje të plota për shkak të një shqetësimi muskulor. Dje, në konferencën për shtyp nga kompleksi "Tropikal" ku Kombëtarja qëndron e grumbulluar, futbollisti i Kombëtares ka konfirmuar gatishmërinë e tij për këto dy ndeshje. Në fjalët e tij të pakta, "Pitbulli" kuqezi tregon me deklaratën e tij se nuk ka rëndësi skema, por funksionimi i grupit për të bërë që gjithçka të shkojë siç duhet në fushë.

Forma - Amir Abrashi ka komentuar gjendjen e tij fizike, duke konfirmuar se është i gatshëm dhe nuk ka më asnjë shqetësim. "Për momentin jam mirë, edhe për ndeshjen nuk ka problem, jam 100% i gatshëm. Kisha vetëm diçka muskulore në ditët e para, por tani çdo gjë është në rregull", është shprehur ai fillimisht.

Lider - Amir Abrashi është ndër lojtarët me më shumë ndeshje si kuqezi, si edhe ndër ata me moshën më të madhe, ndaj për mesfushorin shtohet përgjegjësia për të bërë edhe në njëfarë mënyre liderin në fushë. "Në këtë ndeshje unë jam ai që kam më shumë ndeshje pas Berishës. Në këtë grumbullim e ndiej veten mirë. Dua ta ndihmoj ekipin me eksperiencën time dhe ta forcojmë sërish grupin", ka vijuar mesfushori.

Skema - Eksperienca që ka me Kombëtaren, apo edhe me Fraiburgun në Gjermani i kanë dhënë mundësinë që të provojë shpesh disa rreshtime në fushën e lojës dhe Abrashi përgjigjet në lidhje me sistemin 3- 5- 2 që përzgjedh Reja. "Skemat i kam pranuar prej kohësh. Nuk ka rëndësi skema që luajmë, por e rëndësishme është të funksionojë grupi dhe jemi në drejtim të mirë. Edhe pse e kemi humbur ndeshjen me Lituaninë, shpresojmë të marrim 3 pikë me Kazakistanin. Ende e vuaj ndeshjen me Lituaninë, gjithashtu edhe të tjerët. E kemi detyrë për të marrë dy fitore. Por ndeshja e parë është të dielën, uroj që të marrim tri pikë dhe pastaj flasim për Lituaninë", ka deklaruar Abrashi.