Nga vlerësimi për ministrat te ndryshimi i kryesisë dhe sekretarëve, çfarë pritet të vendosë sot Asambleja e PS
Integrimi, Holanda ndan Shqipërinë nga Maqedonia, Soreca: Duhet të arrestohen zyrtarë të lartë
Pas vështirësisë për të hapur procesin e negociatave për anëtarësim në Bashkimin Europian, Shqipëria duket se do të gjendet sërish përballë një pengese jo të vogël për të organizuar tryezën e parë ndërqeveritare të negociatave.
Paralajmërimi i fortë për Shqipërinë këtë herë ka ardhur nga ministri i Jashtëm i Holandës, Stef Blok. Ky i fundit, duke folur në Parlamentin holandez ka bërë thirrje haptazi për ndarjen e Shqipërisë nga Maqedonia e Veriut në procesin e integrimit. Sipas Blok, bëhet fjalë për një proces që avancon ose ngec në bazë të performancës individuale të çdo shteti. “Ne mirëpresim dallimin e bërë midis kornizave negociatore për Maqedoninë e Veriut dhe Shqipërinë. Kjo është në përputhje me qëllimin e qeverisë për të shkëputur fatin e tyre për negociatat, sepse në fund të fundit, negociatat duhet të bazohen në meritat individuale të të dy vendeve. Për këtë arsye është e rëndësishme që të zhvillohen dy procese të pavarura negocimi”, tha Blok në Parlamentin holandez. PROBLEMET E SHQIPËRISË Shefi i diplomacisë holandeze në qëndrimin e tij në Parlament u ndal edhe në problematikat që Shqipërisë, që vendi duhet t’i tejkalojë para se palët të ulen në tryezën e parë ndërqeveritare. “Mbajtja e Konferencës së parë Ndërqeveritare me Shqipërinë varej nga veprimet konkrete në luftën kundër krimit të organizuar dhe korrupsionit. Demonstrimi i një historiku me fakte në luftën kundër krimit të organizuar dhe korrupsionit ishte dhe mbetet një nga kushtet vendimtare në gjykimin për Shqipërinë. Jemi informuar për mosmarrëveshjet për Reformën e re Zgjedhore si dhe pengesat në funksionimin e Gjykatës Kushtetuese”, deklaroi ministri i Jashtëm holandez. AMBASADA HOLANDEZE Ndërkohë, pas deklaratave të Blok në Parlamentin holandez, ka reaguar edhe ambasada e këtij vendi në Shqipëri, duke dhënë detaje për sa i takon procesit dhe se kur do të merret një vendim për ecurinë e negociatave të Shqipërisë. “Dje,
Parlamenti holandez diskutoi shkurtimisht një letër që ministri i Jashtëm, Blok i pati dërguar parlamentit në datë 4 shtator. Letra i referohej draftit të kuadrit të negociatave për Shqipërinë dhe Maqedoninë e Veriut, shpërndarë nga Komisioni Europian në datën 1 korrik dhe që së fundmi po diskutohet në Bruksel.
Në datë 6 tetor, Holanda gjithashtu mori paketën vjetore të zgjerimit të publikuar nga Komisioni Europian, pjesë e së cilës është dhe raport progresi për Shqipërinë për 2020- ën. Si zakonisht, qeveria holandeze do t’i dërgojë një vlerësim të kësaj pakete Parlamentit në javët në vijim. Kjo do të vijohet nga një debat sipas procedurave parlamentare. Do të jetë takimi i Këshillit të Çështjeve të Përgjithshme në nëntor, ku do të diskutohet paketa e zgjerimit,” shkruhej në deklaratën e ambasadës.
Mbajtja e Konferencës së parë Ndërqeveritare me Shqipërinë varej nga veprimet konkrete në luftën kundër krimit të organizuar dhe korrupsionit. Demonstrimi i një historiku me fakte në luftën kundër krimit të organizuar dhe korrupsionit ishte dhe mbetet një nga kushtet vendimtare në gjykimin për Shqipërinë.