Rama bisedë me Merkel, në fokus reformat për integrimin
Rama: “Folëm për Konferencën e Parë Ndërqeveritare me BE”. Merkel: “Reformat do të përcaktojnë shpejtësinë e bisedimeve”
Kryeministri Rama zhvilloi dje një video- konferencë me Kancelaren gjermane, Angela Merkel, me fokus në disa prej çështjeve më të rëndësishme të ditës për të dyja vendet.
Ishte Kryeministri Rama i pari, i cili përmes një postimi në rrjetet sociale, njoftoi se kishte folur me Kancelaren gjermane për mundësinë e nxitjes së investimeve europiane në Ballkanin Perëndimor, si dhe përpjekjet e Shqipërisë për të avancuar sa më shumë drejt Konferencës së Parë Ndërqeveritare me BE- në. Duke e vlerësuar si një mike që e njeh shumë mirë rajonin e Ballkanit dhe Shqipërinë më veçanërisht, Rama tha se në fokus të bisedës online ishte ecuria e kryesimit të Shqipërisë të OSBE- së. “Me Kancelaren Merkel biseduam pak më parë përreth 60 minuta mbi planin e madh të investimeve të Bashkimit Europian për Ballkanin Perëndimor dhe nxitjen e mëtejshme drejt ‘ Shengenit’ rajonal; progresin e Shqipërisë pas vendimit për çeljen e negociatave dhe përpjekjet në vijim drejt Konferencës së Parë Ndërqeveritare me BE- në, si edhe kryesimin e suksesshëm të OSBE- së nga Shqipëria dhe sfidat deri në përmbylljen e mandatit tonë në dhjetor. Edhe njëherë, si gjithnjë, kënaqësi e veçantë biseda me Kancelaren gjermane, një mike e shkëlqyer që e njeh, e kupton dhe e ndjek rajonin tonë e Shqipërinë gjithashtu, me detaje e vëmendje krejt të posaçme!”, shkroi Rama.
Por pas këtij postimi të Ramës, ishte Zëdhënësi i Qeverisë Federale, Steffen Seibert, i cili zbuloi të tjera detaje nga biseda përmes video- konferencës. Sipas tij, në bisedë u nënvizua edhe rëndësia e vazhdimit të reformave nga Shqipëria, të cilat do të përcaktojnë edhe ritmin e integrimit të Shqipërisë në BE. “Kancelarja Federale, Angela Merkel, dhe Kryeministri i Shqipërisë, Edi Rama, zhvilluan sot ( dje) një bisedë me njëri- tjetrin përmes një video- konference. Ata biseduan për situatën e pandemisë, marrëdhëniet bilaterale dhe ekonomike, si dhe për situatën në rajon dhe përparimin e Shqipërisë në kuadër të procesit të integrimit në BE. Këshilli Europian ka vendosur në mars 2020 të hyjë në bisedimet zyrtare të pranimit me Shqipërinë. Reformat e rëndësishme, të cilat do të përcaktojnë shpejtësinë e bisedimeve, prekin para së gjithash drejtësinë dhe luftën kundër krimit të organizuar dhe korrupsionit”, shkroi Steffen Seibert.