Basha: Rama do mbajë përgjegjësi penale për keqmenaxhimin e krizës
"Ne do ta ndjekim paranë brenda dhe jashtë Shqipërisë, ku e kanë çuar pushtetarët e korruptuar dhe ortakët e tyre"
Kur kanë kaluar më shumë se 2 javë që nga dita kur kryedemokrati Lulzim Basha së bashku me ekipin e tij prezantoi planin me 5 pika për rimëkëmbjen e ekonomisë, Kryeministri Rama deklaroi dje se nuk ka dëgjuar rreth planit të PD- së.
Një gjë të tillë e konfirmoi edhe kreu i selisë blu, Lulzim basha. Por ky i fundit, gjatë një konference për mediat, tha se Kryeministri Rama mund të mos e ketë dëgjuar vërtet, pasi kreu i qeverisë, sipas tij, nuk dëgjon njeri përveç atyre që Basha i quajti ortakë të Kryeministrit në korrupsion. Por, ndërsa ditët kalojnë dhe situata e familjeve dhe bizneseve shqiptare përkeqësohet, kryedemokrati e paralajmëroi Ramën se nuk do të mbajë vetëm përgjegjësi politike për keqmenaxhimin e krizës, por edhe penale. "Po jua them edhe një herë; ndërkohë që jashtë bie shi, familje në të gjithë zonën e goditur nga tërmeti vazhdojnë të qëndrojnë në çadra. Vazhdojnë të qëndrojnë në çadra! Asgjë nuk mund të justifikojë dhe të shpëtojë Edi Ramën nga përgjegjësia e qytetarëve se pse jemi i vetmi vend në rajon që në kohë sfidash ekonomike, edhe për shkak të pandemisë, paratë e shqiptarëve i merr, por nuk i çon te shqiptarët, por vazhdon t'i çojë te një grusht njerëzish. E ka për detyrë ta zbatojë. Në kushtet e neglizhencës, shpërfilljes, siç e tha vetë, mosdëgjimit të zërit të njerëzve që kërkojnë ndihmë, qytetarëve të revoltuar, të nënave të dëshpëruara, të prindërve dhe kryefamiljarëve në pikën e fundit ku u ka ardhur aty ku s'mban më, atëherë ju siguroj që përgjegjësia që do të ketë nuk do të jetë thjesht dhe vetëm përgjegjësi politike, të cilën do ta mbajë një më një, por do të jetë edhe përgjegjësi penale. Këtë mund t'jua garantoj sot", tha Basha gjatë konferencës.
NAFTËTARËT Për kreun e selisë blu, edhe problemi i naftëtarëve në Ballsh, të cilët prej dy javësh janë në grevë urie, ka zgjidhje. Basha akuzoi Kryeministrin se nuk ka vullnet dhe se qëndron në krahun e biznesmenëve dhe jo të qytetarëve. "Edi Rama është kokë e këmbë i përfshirë në aferat e rafinerisë dhe në aferat që kanë të bëjnë me naftën. Ndaj, zgjidhja e këtij problemi është plotësisht e realizueshme, por kërkon mbi të gjitha një Kryeministër dhe një qeveri që nuk është pjesë e aferave korruptive me Ballshin dhe me naftën në tërësi. Dhe kjo është ajo që naftëtarët e Ballshit, familjet e tyre, e gjithë zona e Patos Marinëzës, i gjithë Qarku i Fierit do të kenë në dorë të vendosin me 25 prill. Sa për ne, prioritet janë të qarta: Së pari, heqja me urgjencë e taksës "Rama" mbi karburantin prej 240 lekësh për litër. Kontrolli rigoroz i karburanteve, që po shkatërron automjetet e shqiptarëve dhe ekonominë e Shqipërisë, qofshin automjete private apo të transportit. Dhe rikthimi në arkën e shtetit të një shume, prej të paktën 50 milionë eurosh në vit, të evazionit që i bëhet arkës së shqiptarëve nga ky sektor", vijoi Basha.
PPP Kreu i selisë blu u zotua sërish se kur të vijë në pushtet, do të anulojë koncesionet korruptive dhe do të sekuestrojë paratë e korrupsionit. "Paratë e shqiptarëve që kanë shkuar për këtë aferë të tmerrshme korruptive, do të gjurmohen kudo ku kanë shkuar dhe do t'u kthehen shqiptarëve", tha Basha. Gjatë konferencës, kreu i PD- së u pyet edhe për procesin e nisur në PD për kandidatët për deputetë. Pak ditë më parë, PD përfundoi procesin e konfirmimit të kandidatëve nga anëtarësia. Në lidhje me këtë, Basha tha se vendimi i anëtarësisë do të jetë gur themeli për listat. "Partia Demokratike është e vendosur të ecë në një model të ri, që është parakusht për ndryshimin që do të sjellim për të gjithë shqiptarët, një model që fillon duke dëgjuar njerëzit brenda bazës sonë. Kjo është arsyeja pse kemi adoptuar një model të evidentimit të kandidatëve me ndihmën dhe përvojën e vendeve perëndimore, ku zëri i anëtarësisë dëgjohet në propozime dhe vota e anëtarësisë dikton në vendimmarrje. Kjo është arsyeja pse ky proces ka pasur një pjesëmarrje rekord dhe një vëmendje rekord nga qytetarët dhe nga media. Dhe unë jam i lumtur që ky proces është një gur themeli i një mënyre të re dhe një qasje të re të vendimmarrjes, sot politike dhe nesër qeverisëse për shqiptarët. Pa diskutim, vota e anëtarësisë është ajo që ka vendosur dhe do të respektohet", tha kryedemokrati.