PD: Rruga Korçë- Ersekë me tender të paracaktuar, pesëfish i kostos reale
Partia Demokratike akuzoi dje qeverinë se ka dhënë pa garë dhe me një vlerë të fryrë tenderin për ndërtimin e rrugës Korçë- Ersekë. Sekretari i burimeve njerëzore në PD, Ervin Minarolli, përmes një deklarate nga selia blu, u shpreh se Kryeministri Rama ua ka dhënë tenderin miqve të tij me vlerë 5- fish më të lartë. "Pak ditë më parë, paralajmëruam një vjedhje flagrante të kësaj qeverie me rrugët. Bëhet fjalë për një segment 4 kilometra të rrugës Korçë- Ersekë, e cila është tenderuar me gati 5- fishin e kostos dhe është fituar nga miqtë e Edi Ramës, Ndue dhe Agim Kola. Ndodhi siç e parashikuam ne, fituesi ishte i paracaktuar, tenderi ishte fiktiv. 4 kilometra rrugë do të kushtojnë 20 milionë euro, në vend që të kushtonin 4 milionë euro. Është një vjedhje e pastër, si në çdo rrugë që ka tenderuar kjo qeveri. Nuk ka në Shqipëri, qoftë edhe 1 kilometër rrugë, ku këta të mos kenë vjedhur miliona euro", tha Minarolli. Në vijim, ai tregoi edhe skemën e korrupsionit që është përdorur sipas tij. "Skema e korrupsionit është fare e qartë. Qeveria hap tenderin 20 milionë euro 4 kilometra. Miqtë e Kryeministrit marrin pjesë në garë, paraqesin ofertën më të lartë dhe fitojnë në një garë fiktive, pasi kompanitë e tjera pjesëmarrëse kanë mungesë dokumentacioni. Kjo është një praktikë korruptive, e kthyer në normë nga kjo qeveri. Tenderi paracaktohet dhe kompanitë e tjera garojnë në mënyrë fiktive. Me Edi Ramën Kryeministër, gara për tendera nuk ekziston. Gjithçka është e paracaktuar përmes korrupsionit. Segmenti i parë i rrugës KorçëErsekë ka nisur ndërtimin që në vitin 2012. E gjithë rruga ishte projektuar me 1 milion euro kilometri, por në muajt e fundit në pushtet, qytetarët po zhvaten me babëzinë më të madhe dhe 4 kilometra kushtojnë 20 milionë euro. Me kaq shumë parà, mund të ndërtohej e gjithë pjesa e mbetur e rrugës", vijoi Minarolli. Ndërkohë, ai shtoi se tenderi është fituar nga oferta që përbën 98% të fondit limit të vendosur.