Masazhe e prostitucion në ish- Bllok, arrestohet menaxheri
Në pranga edhe klienti 30- vjeçar, procedohen 3 vajzat e “punësuara”
Qendrat e masazheve në Tiranë vijojnë të jenë nën monitorimin e rreptë të oficerëve të Trafiqeve të Paligjshme, duke qenë se në jo pak raste ka rezultuar të jenë kthyer në baza prostitucioni.
I tillë ishte dhe rasti më i fundit, ku në një qendër masazhesh në rrugën “Abdyl Frashëri”, në zonën e ish- Bllokut, u arrestua menaxheri e një klient, si dhe u proceduan tri vajza të punësuara si masazhatore, por që në fakt bënin edhe “shërbim” ekstra. Policia tha dje se është vënë në pranga 27vjeçari Rigers F., i akuzuar për “Shfrytëzim prostitucioni” dhe “Mbajte e lokaleve për prostitucion”, si dhe një 30- vjeçar, i cili ishte klient në këtë qendër dhe u kap në flagrancë me një prej vajzave të punësuara si masazhatore. Burimet thanë se 27- vjeçari Rigers F. i rekrutonte vajzat, të cilat në fakt i paguante fillimisht për të kryer masazhe, por pasi kalonin disa ditë, atyre u bëhej e qartë që do të kryenin edhe marrëdhënie seksuale kundrejt pagesës.
OPERACIONI Policia e Tiranës njoftoi dje se ishte zbuluar një tjetër qendër masazhi ku ushtrohej veprimtaria e prostitucionit dhe në ambientet e saj është arrestuar menaxheri dhe një klient. Ndërsa tri vajza janë proceduar në gjendje të lirë për ushtrim prostitucioni. Mësohet se kjo qendër ndodhet në një nga rrugët kryesore të kryeqytetit, rruga
“Abdyl Frashëri”, në zonën e ish- Bllokut. Menaxheri i qendrës, Rigers F., i rekrutonte punonjëset e qendrës përmes rrjeteve sociale si masazhatore dhe më pas i detyronte të kryenin prostitucion. “Specialistët e Seksionit për Hetimin e Trafiqeve të Paligjshme në Drejtorinë Vendore të Policisë Tiranë, pasi kishin siguruar të dhëna në rrugë operative se disa shtetase shfrytëzoheshin për prostitucion nga menaxheri i një qendre masazhi, kanë organizuar punën për të dokumentuar veprimtarinë kriminale të këtij shtetasi. Në bazë të provave të grumbulluara, pas një hetimi disamujor, u organizua dhe u finalizua operacioni policor i koduar ‘ Rekrutimi’, në kuadër të të cilit u kap dhe u vu në pranga shtetasi Rigers F., 27 vjeç, banues në Tiranë. Ky shtetas, në cilësinë e menaxherit të qendrës të masazhit, rekrutonte femra nëpërmjet rrjeteve sociale, me pretendimin për t’i punësuar si masazhatore dhe më pas i detyronte që t’iu ofronin klientëve të qendrës së masazhit edhe shërbime seksuale”, deklaron Policia. “Gjithashtu, në vijim të operacionit u arrestua në flagrancë një shtetas 30- vjeçar ( klient i qendrës së masazhit) dhe u proceduan penalisht 3 punonjëse të qendrës së masazhit, për veprën penale ‘ Prostitucioni’”, tha zyrtarisht Policia e Tiranës.