Celibashi pret Sorekën, BE do japë ndihmë teknike për zgjedhjet
Ambasadori i BE premton ndihmë për zbatimin e “5 qershorit”
Shefi i Delegacionit të Bashkimit Europian në Shqipëri, Luigi Soreca, zhvilloi dje një takim me kryekomisionerin e ri të zgjedhjeve, Ilirjan Celibashin. Në takimin e tyre të parë, pasi Celibashi mori detyrën e kryekomisionerit të zgjedhjeve, u diskutua mbi mënyrat se si Bashkimi Europian mund të japë ndihmë në përgatitjen e zgjedhjeve të ardhshme të 25 prillit. Gjithashtu, një temë që u trajtua gjatë takimit mes tyre ishte edhe sfida më të cilën përballet Komisioni Qendror i Zgjedhjeve, duke qenë se zgjedhjet e 25 prillit do të jenë të parat që do të administrohen me një organizim ndryshe të këtij institucioni. “Urova sot Ilirjan Celibashin për emërimin e tij si Komisioneri Shtetëror i Zgjedhjeve. Diskutuam sfidat e rëndësishme me të cilat përballet KQZ- ja për të zbatuar me shpejtësi Reformën Zgjedhore të 5 qershorit, si dhe mënyrën se si BE- ja mund të japë ndihmë teknike në prag të zgjedhjeve të prillit të ardhshëm”, shkroi ambasadori i BE- së, Luigi Soreca, pas takimit me kryekomisionerin e ri të Komisionit Qendror të Zgjedhjeve, Ilirjan Celibashin. Takimi mes Ilirjan Celibashit dhe Luigi Soreca- s vjen në një kohë kur në KQZ tashmë ka nisur procesi për të përgatitur infrastrukturën që do të mundësojë aplikimin e teknologjisë në zgjedhje, e cila do të jetë përgjegjësi direkte e nënkryekomisioneres, Lelba Pelinkut. Vetëm pak ditë më parë, në një mbledhje të zhvilluar në Komisionin Qendror të Zgjedhjeve u vendos ngritja e grupit të punës që do të merret me gjetjen dhe përgatitjen e modeleve që mund të aplikohen në Shqipëri për zgjedhjet e 25 prillit. Sipas urdhrit që është firmosur nga komisioneri Ilirjan Celibashi dhe nënkomisionerja Lealba Pelinku, në përfundim grupi i punës duhet të përgatisë një raport dhe më pas duhet t’ia dorëzojë Komisionerit. Kryekomisioneri Celibashi deklaroi gjatë takimit se përgatitja e infrastrukturës për identifikimin elektronik të votuesve do të një sfidë jo e lehtë, pasi edhe koha në dispozicion nuk është shumë e madhe. KQZja, pas votimit që u bë në Kuvend, në 25 prill do të jetë me një model të ri. Ndryshe nga përbërja e mëparshme, KQZ- ja tashmë do të ketë një kryekomisioner dhe nënkryekomisionere, Komisionin Rregullator dhe Komisionin e Ankesave dhe Sanksioneve.