Vakanca e dytë, Presidenti pret emrin nga KED
Sonila Bejtja, e vetmja që ka kaluar filtrat deri tani në KED
Në vijim të procedurave dhe ribërjen funksionale të Gjykatës Kushtetuese janë 5 vende që duhet të plotësohen, për ta vënë në punë këtë institucion. Aktualisht, Gjykata Kushtetuese ka vetëm 4 anëtarë, Vitore Tushën ( e mbetur nga trupa e mëparshme), Marsida Xhaferrllari ( e zgjedhur nga Presidenti) dhe Fiona Papajorgjin me Elsa Toskën ( të votuara nga Kuvendi). Për ta bërë të mundur mbledhjen e kësaj gjykate dhe marrjen e një vendimi për çështjet që janë depozituar aty prej disa muajsh, Gjykata Kushtetuese duhet që së paku të ketë 6 anëtarë. Procedura për zgjedhjen e anëtarëve është vendosur, që 3 votohen nga Parlamenti, 3 dekretohen nga Presidenti dhe 3 zgjidhen nga radhët e Gjykatës së Lartë ( e cila gjithashtu është jashtë funksionit për shkak të vetingut). Presidenti Meta vitin e shkuar zgjodhi si anëtar për të shkuar në Kushtetuese Besnik Muçin, por ky i fundit u rrëzua nga procesi i vetingut. Më pas kreu i shtetit zgjodhi Marsida Xhaferrllarin, që iu bashkua Elsa Toskës dhe Fiona Papajorigjit, që u zgjodhën të dyja në një ditë nga Parlamenti. Me largimin e Muçit, Presidentit i lind e drejta që të propozojë një tjetër emër, për përzgjedhjen e të cilit gara ka filluar prej disa muajsh. Nga 6 emrat që dorëzuan dokumentacionin, KED- ja ka kualifikuar vetëm Sonila Bejten, e cila tashmë pritet që t’i shkojë Presidentit si kandidatura e vetme për të plotësuar vakancën e lënë bosh nga Muçi. Krahas këtij procesi, Presidenti Meta shpalli dje edhe emrat e aplikantëve që kanë dorëzuar dokumentet për të garuar për në Gjykatën Kushtetuese për të zënë vendin e Besnik Imerajt. Bashkë me Presidentin, edhe Kuvendi disa javë me herët ka shpallur procedurat për të çuar edhe emrin e tretë që i ka caktuar Kushtetuta për në gjykatën më të lartë të sistemit të drejtësisë shqiptare. Në rastin më të mirë, nëse Gjykata Kushtetuese do mund të bëhet me 6 anëtarë brenda këtij viti, janë disa çështje me peshë të rëndësishme në politikë që presin të marrin zgjidhje. Ndër to, vlen të përmendim atë për vlefshmërinë e zgjedhjeve lokale të 30 qershorit dhe shembjen e godinës së Teatrit Kombëtar. Por për ta parë Gjykatën Kushtetuese me 9 anëtarë, sipas gjasave, do duhet të presim shumë gjatë, pasi një gjë e tillë mund të ndodhë vetëm pasi Gjykata e Lartë të bëhet me 15 anëtarë.