Nga “komandimi i ushtrisë”, tek integrimi dhe Kodi i ri Zgjedhor, përplasja e plotë mes Ramës dhe Metës
Rama: Ilir, ti je thjesht “komandant” i LSI- së në kohë paqeje, Forcat e Armatosura nuk janë nën komandën e Presidentit
Duke rikthyer konferencat e përjavshme për mediat, Presidenti Meta i çoi në një tjetër nivel edhe akuzat për Kryeministrin Rama.
Në fillim Presidenti foli për pasojat që ka krijuar vendimi i qeverisë për mbajtjen e maskave dhe aplikimin e gjobave, duke e konsideruar një gjë tillë se aspak normale dhe që rëndon së tepërmi në xhepat e qytetarëve. Por pas konfirmimit se do të kthejë ndryshimet e Kodit Zgjedhor, që u miratuan në fillim të tetorit, Meta ngriti tonet ndaj Kryeministrit Rama dhe maxhorancës socialiste. Për Metën, PS- ja mund të provojë izolimin, për të cilin aludoi deputeti socialist Bujar Çela të enjten e shkuar, pasi ai nuk do të bëjë asnjë hap dhe do të tregojë që ashtu siç përshkruhet në Kushtetutë, do të bëhet ushtari i parë i Republikës. Në këtë pikë, Presidenti lëshoi edhe një thirrje për Kryeministrin, duke i bërë apel që ta provojë se sa patriot është. Duke marrë shembull deklaratën e ish- Presidentit të Bosnjës në vitin 1992, Alija Izetbegoviç, Meta i kërkoi Ramës që të tregojë nëse është peng, pasi populli shqiptar nuk mund të mbahet peng. Kësaj deklarate të fortë të Presidentit, Rama iu përgjigj përmes rrjeteve sociale, duke theksuar se në kohë paqe nuk është Presidenti ai që i komandon Forcat e Armatosura. Më tej deklaratës së Ramës, se Meta është vetëm komandat i LSI- së, ky i fundit iu përgjigj përmes zëdhënësit, Tedi Blushi, i cili nga një postim në “Facebook”, i bëri thirrje për reflektim sa është në kohë.
META Çdo lloj mase që merret për arsye shëndetësore, e certifikuar nga ekspertë, është e mirëpritur për të garantuar parandalimin e përhapjes së COVID- 19. Por përmbajtja e aktit që gjobit qytetarët për mosmbajtjen e maskave është një maskaradë, sepse: shkel në mënyrë flagrante të drejtat e qytetarëve, mund t’i lërë pa drita në fund të muajit, në mes të dimrit, i shantazhon deri në humbjen e lirisë; e shndërron OSHEE- në nga një kompani që ka për detyrë furnizimin me energji elektrike, në një instrument policor, ndoshta edhe elektoral, që ekzekuton në mënyrë të paligjshme gjoba! Nuk është zgjidhje t‘ i lësh njerëzit pa drita! Nuk është zgjidhje që në fund të muajit, kur mos të kenë mundësi të paguajnë dot dy herë gjobat e përfshira në faturën e OSHEE- së, t‘ ua presësh dritat dhe t‘ i shantazhosh me burg qytetarët! Çdo ndodhë me familjet, që në situatë tepër të vështirë ekonomike, do mbifaturohen me shumat e gjobave dhe në fund të muajit do jenë në pamundësi për të paguar? Do shkojë OSHEE- ja t‘ u presë dritat?! OSHEE- ja ka për mision të furnizojë me energji elektrike në mënyrë të pandërprerë. OSHEE- ja nuk mund të ndërpresë furnizimin me energji elektrike për mosmbajtjen e maskës. A e ka këtë mision OSHEE- ja?! I bëj thirrje qeverisë të reflektojë menjëherë. I bëj thirrje Kuvendit ta shqyrtojë sa më parë këtë Akt Normativ dhe ta ndryshojë atë! Barrierat mbrojtëse, maskat e distancimin fizik, duhet t‘ i respektojmë të gjithë, për të mbrojtur veten, të afërmit dhe njerëzit tanë, për të mposhtur sa më shpejt këtë pandemi të rrezikshme, dhe jo për t‘ i shpëtuar ndëshkimit të qeverisë në mënyrë arbitrare!
T’u bëjnë thirrje gjithë prokurorëve në botë, edhe gjithë policive në botë, Presidenti këtu është dhe të shohim se kush do ta izolojë Presidentin. Zero shans, qëllimi i vërtetë është për të fshehur izolimin që ky grup i strukturuar kriminal që ka uzurpuar PS- në dhe kuvendin një partiak ka qëllim izolimin e Shqipërisë nga Europa. Kthimin e Shqipërisë në kohët më të errëta të partisë shtet. Presidentin këtu e kanë. Madje dhe kur është Presidenti, le të guxojnë të vijnë të zënë këtë institucion. Qëllimi i vërtetë i tyre është shtyja në errësirë e Shqipërisë. Defaktorizimi i shqiptarëve përmes defaktorizimit të Shqipërisë.
Mbrojtja e Kushtetutës nuk është territori i askujt, është detyrë e parë e Presidentit të Republikës. Dhe në këtë drejtim, Presidenti nuk është vetëm komandant i përgjithshëm i Forcave të Armatosura, por është ushtari i parë i Republikës dhe duhet ta dijë kushdo. Ka ardhur koha për të verifikuar ndershmërinë, patriotizmin e çdo politikani, por mund edhe të çdo qytetari. Dhe ta dinë të gjithë edhe armiqtë e Shqipërisë se do ta marrin përgjigjen atje ku nuk i shkon mendja. Boll i futën duart e tyre të zeza këtu, për të na bërë një vend gazi i botës. Ndërsa atij zotërisë i them, përpiqu të bësh aq sa bëri Izetbegoviçi kur e morën peng. Thuaji popullit tënd që jam peng dhe vazhdo punën tënde, sepse këtë popull dhe këtë komb, nuk e merr askush më peng nën këtë qiell dhe mbi këtë tokë”.
RAMA “Ilir, ti je thjesht “komandant” i LSI- së, sepse Shqipëria nuk është në luftë dhe në kohë paqeje Forcat e Armatosura nuk janë nën komandën e Presidentit të Republikës, i cili sipas Kushtetutës nuk komandon asgjë dhe askënd, po mishëron unitetin kombëtar dhe jo dasinë, sherrin, degradimin!”
PRESIDENCA “Një sqarim për të gjithë kolegët e nderuar gazetarë: Referenca për “pengun” i adresohet direkt Kryeministrit ende në detyrë që duhet të heqë urgjentisht dorë nga pengmarrja e së ardhmes europiane të Shqipërisë! Kjo është e qartë! ‘ Buburrec trendi’, mos fol më për Kushtetutën, që e ke përdhosur si bandit nga viti 2008 e deri tani. Përndryshe, as ‘ pampersat’ s’të bëjnë derman! Thellohu e reflekto urgjent!”