Kuvendi, me rezolutë për antisemitizmin, në Tiranë Forumi i lartë Ballkanik
Parlamenti do të miratojë projektrezolutën kundër antisemitizmit me kërkesa për qeverinë në fushën e arsimit dhe atë juridike
Me iniciativë të Kryetarit të Grupit Parlamentar Socialist, Taulant Balla, Kuvendi i Shqipërisë do të zhvillojë një Forum Ballkanik për Luftën kundër Antisemitizmit. Forumi do të organizohet nga Parlamenti i Shqipërisë më 28 tetor në partneritet me Lëvizjen Kundër Antisemitizmit ( CAM) dhe Agjencinë Hebraike për Izraelin. Në njoftim thuhet se “në frymën e miqësisë historike të Shqipërisë me popullin hebre, ky Forum përurues do të shërbejë si një model për vendet e tjera në rajon dhe më gjerë”. Forumi pritet të ketë pjesëmarrës të lartë politikë nga vendet e Ballkanit, por nuk do të mungojnë dhe përshëndetjet nga personalitete të larta botërore. Gjithashtu, në të njëjtën kohë, parlamenti i Shqipërisë do të miratojë një rezolutë, e cila adopton disa deklarata dhe rezoluta të organizmave ndërkombëtare në luftën ndaj antisemitizmit. “Kuvendi do të miratojë përkufizimin e përdorshëm mbi antisemitizmin, jo të detyrueshëm ligjërisht, të përcaktuar nga Aleanca Ndërkombëtare për Përkujtimin e Holokaustit, sipas të cilit: “Antisemitizmi është një perceptim i caktuar për hebrenjtë, i cili mund të shprehet si urrejtje ndaj hebrenjve. Manifestimet retorike dhe fizike të antisemitizmit drejtohen ndaj individëve hebrenj ose johebrenj dhe/ ose ndaj pronës së tyre, ndaj institucioneve dhe objekteve fetare të komunitetit hebraik”, thuhet në rezolutën e Kuvendit. Përmes kësaj rezolute, Kuvendi i kërkon qeverisë shqiptare “të përdorë këtë përkufizim pune mbi antisemitizmin, jo të detyrueshëm ligjërisht, të përcaktuar nga Aleanca Ndërkombëtare për Përkujtimin e Holokaustit, si një instrument orientues në fushën e edukimit, si dhe për mbështetjen e autoriteteve juridike dhe ndëshkimore në përpjekjet e tyre për zbulimin dhe goditjen me efikasitet të sulmeve antisemitike; të vazhdojë dhe të forcojë luftën ndaj çdo shfaqjeje të intolerancës dhe diskriminimit që mund të çojë në akte urrejtjeje dhe dhune, përfshirë dhe antisemitizmin; të rrisë masat sensibilizuese dhe edukative në kuadrin e luftës kundër manifestimeve të intolerancës dhe diskriminimit, përfshirë dhe antisemitizmin”.