Skandali vijon, Elona Toro kandidon për Gjykatën e Lartë
Vetingu s’i ka mbaruar, e vlerëson i shoqi, anëtar i KLGJ- së
Në mbledhjen e zhvilluar në platformën "online" më datë 17 shtator, Këshilli i Lartë Gjyqësor miratoi disa vendime mes të tjerave edhe verifikimin për plotësimin e kritereve të kandidatëve për anëtarë të Gjykatës së Lartë.
Në mesin e kandidatëve, bie në sy edhe emri i gjyqtares së Apelit, Elona Toro, e cila synon një post në gjykatën supreme. Në fakt, kandidimi i saj nuk do të përbënte lajm, por në rastin e kësaj gjyqtareje ka dy probleme themelore. Së pari, Elona Toro ende nuk e ka përmbyllur përballjen me procesin e vetingut. Ajo është konfirmuar me shumicë votash në shkallë të parë, por anëtarja e KPK- së, e cila doli në pakicë ngrinte një sërë pikëpyetjesh për pasurinë e saj. Pra, edhe pse pret të përballet me Kolegjin e Apelimit, problemi i dytë që është në fakt, thelbi në këtë proces, është bashkëshorti i gjyqtares. Alban Toro është anëtar i Këshillit të Lartë Gjyqësor, institucion që do të vendosë për fatin e gjyqtares Elona Toro nëse do ta propozojë atë duke e emëruar në Gjykatën e Lartë. Burimet thanë se z. Toro nuk ka qenë pjesë e mbledhjes dhe nuk do të jetë as në vijim kur do të shqyrtohet kandidatura e bashkëshortes. Megjithatë, pyetja që shtrohet është: largimi i tij a e shmang ndikimin mbi anëtarët e tjerë të qeverisë së gjyqësorit? Në fakt, nepotizmi dhe lidhjet familjare në sistemin gjyqësor ishin një nga problemet madhore, prej nga pretendohej se do t'i jepej fund me reformën në drejtësi. Në fakt, siç tregon rasti në fjalë, nepotizmit nuk i është dhënë fund madje, në të njëjtën mënyrë njerëz të drejtësisë, po përpiqen të zaptojnë vendet në institucionet më të rëndësishme, si në gjyqësor ashtu dhe në prokurori.
BASHKESHORTI Zgjedhja e Alban Toros si anëtar i Këshillit të Lartë Gjyqësor në vitin 2018 është bërë në shkelje të ligjit për ngritjen e KLGJ- së. Alban Toro është një nga 11 anëtarët e KLGJ- së, i cili vjen nga radhët e avokatisë. Si i tille ai duhet të mbante mbi supe një eksperiencë të paktën 10- vjeçare pa ndërprerje si avokat. Kriter, të cilin Alban Toro nuk e përmbush. Bazuar ne nenin 19, germa "d", të ligjit nr 115/ 2016, anëtarët e KLGJ- së që vijnë nga avokatia duhet të kenë 15 vjet përvojë pune në profesion si jurist, nga të cilat të paktën 10 vitet e fundit të kenë ushtruar profesionin e avokatit pa ndërprerje. Ligji nuk specifikon kriteret e vlerësimit të juristëve të spikatur, por ajo që mund të vërtetohet me lehtësi është fakti se gjatë periudhës 20102018, Alban Toro e ka pezulluar 3 herë aktivitetin e tij si avokat. Këto janë të dhëna të regjistruara në qendrën kombëtare të biznesit. Konkretisht rezulton se Toro është regjistruar në QKB për të ushtruar profesionin si avokat më datë 16 nëntor 2007. Duke iu referuar të dhënave të qendrës kombëtare të biznesit, rezulton se Alban Toro nga data 02
Mars 2010 deri në datën 20 shtator 2011 e ka pezulluar ushtrimin e aktivitetit si avokat për afro 1 vit e gjysmë. Më pas, ai e ka ushtruar profesionin nga data 20 shtator 2011 deri në datën 27 shkurt 2018. Por aktiviteti ka rinisur brenda 2 muajsh, për t'u pezulluar sërish në 21 dhjetor 2018, kohë kur mori detyrën si anëtar i KLGJ- së me mandat 5- vjeçar, i vlefshëm deri në dhjetor 2023.