Rama: Naftëtarët të ndërpresin grevën, jam i gatshëm për të diskutuar
Basha: Rama u ka premtuar 16 rroga naftëtarëve në 2018, nuk negociohet me terroristët e jo me naftëtarët, u ke vënë lakun
Kur greva e naftëtarëve ka hyrë në javën e tretë për të kërkuar rrogat e prapambetura dhe nisjen e punës së uzinës, Kryeministri Edi Rama e nisi ditën dje me një kërkesë për ta, që të ndërpresin grevën.
Përmes një postimi në "Twitter", Kryeministri shkroi se mund të ulet me ta për të negociuar vetëm pasi të dalin nga greva, ndërkohë tha se është sensibilizuar me shqetësimin e tyre. "U përsëris naftëtarëve të Ballshit që greva e tyre është e panevojshme, sepse unë jam me ta dhe qeveria është e tyrja! Ne jemi plotësisht të ndjeshëm ndaj hallit të tyre, që është edhe halli ynë, dhe është absurde që hallin t'ua qajnë ata që ua shkaktuan! I ftoj vëllazërisht ta ndërpresin grevën dhe jam i gatshëm të ulem e të bisedoj me ta për këtë hall të përbashkët, por jo kështu! Kështu jo, sepse presionet e ultimatumet nuk funksionojnë në asnjë familje dhe punëtorët e Ballshit nuk bëjnë përjashtim nga ky parim i panegociueshëm!", shkroi kreu i qeverisë, Edi Rama.
REAGIMI Pak orë më vonë në konferencën e përditshme tashmë, kryedemokrati Lulzim Basha i kujtoi kreut të qeverisë premtimin që u ka bërë naftëtarëve dy vite më parë përmes një lidhjeje me "Skype". Ndërkohë Basha e akuzoi Kryeministrin Rama se ka përkeqësuar gjendjen ekonomike të shqiptarëve. "Të mos pranosh negociatat me njerëzit të cilëve u ke premtuar dhe je shkaktar që s'ke mbajtur premtimin prej vitit 2016 për rrogat e prapambetura, kësaj nuk di se çfarë emri t'i vësh. Nuk negociohet me terroristët, por mos të negociosh me naftëtarët, të cilëve vetë u ke premtuar dhe vetë u ke shkelur premtimin. U detyrohet 16 rroga Edi Rama. Ka dhënë premtimin. E keni me zë dhe me figurë. E ka bërë me komunikim online përpara 2 vjetësh, në 2018- ën: ' Do të vij shumë shpejt aty, do ta zgjidh e do ta zgjidh'. Gënjeshtra, pallavra, premtime të pambajtura. Dhe tani thotë ' nuk negocioj'. Nuk negocion me kë? Njerëzve të cilëve u ke vënë lakun në fyt? Me njerëzit të cilëve u ke dhënë premtimin ti, je ti përgjegjësi që nuk i kanë marrë ato para. E dinë të gjithë se si ka ecur ajo aferë", tha Basha. Po ashtu, Basha i kujtoi Kryeministrit se nëse ndodh diçka me grevistët, përgjegjësi i vetëm është kryetari i qeverisë. "T'i vërë gishtin kokës një orë e më parë, sepse për çdo jetë të çdo grevisti aty, përgjegjësi është vetëm një, Kryeministri i vendit. Do të ishte në çdo rrethanë me kutin tim të përgjegjshmërisë. Kurse në këtë rrethanë, ku është drejtpërdrejt i përfshirë në të gjitha aferat e rafinerisë dhe të fushave naftëmbajtëse, është dyfish përgjegjës. Në kushtet kur ka premtuar dhe ku s'ka mbajtur premtimin, është trefish përgjegjës për shëndetin dhe jetën e çdo naftëtari dhe çdo familjari të tyre", vijoi Basha.
REFUZIMI Gratë naftëtare refuzuan ndërprerjen e grevës së urisë për pagat e prapambetura dhe rinisjen e punës. Ata thonë se janë gati të flasin, por pasi në llogaritë e tyre të hidhen pagat e prapambetura. "Lekët të na i hedhin në llogari e dalim nga greva. Nuk është një gënjeshtër, është një vit kështu. Të vijë Kryeministri të na shikojë gjendjen, të na japë një zgjidhje dhe pastaj shohim e bëjmë, e ndërpresim ose jo. Nuk jemi dakord fare, nuk e ndërpresim grevën. Të vijë dhe të ulet këmbëkryq, të na shikojë si jemi dhe në ç'gjendje jemi. Këtu do të qëndrojmë, jemi shumë të vendosura. Janë bërë të pabesueshëm, ndryshe nuk ka zgjidhje tjetër", tha njëra prej grave greviste.
I ftoj vëllazërisht ta ndërpresin grevën dhe jam i gatshëm të ulem e të bisedoj me ta për këtë hall të përbashkët, por jo kështu!