Shqiptarët e SHBA- së në ‘ ethe’ për kandidatët presidencialë
Mbështetësit e republikanëve e demokratëve "ndeshen" për më të mirin
Gara presidenciale amerikane ka futur në "ethe" edhe komunitetin shqiptar të Amerikës, të cilët kanë nisur me deklarata gjatë këtyre ditëve të fundit, se cili është kandidati që do të bëjë më shumë për Kosovën.
Profesor Mikel Demaj që është përkrahës i republikanëve ka thënë se nënpresidenti i SHBA- së, Mike Pence, i ka premtuar në një takim në Miçigan përfaqësuesit shqiptar, se Kosova nuk do të ndahet apo "bosnjëzohet" si dhe në përfundim të procesit do të vijë njohja nga Serbia. "Ne mbështetësit e republikanëve kemi shfrytëzuar të drejtën tonë si qytetarë të Amerikës që të bashkëpunojmë me institucionet dhe të kemi ndikim në këto votime", tha ai duke shtuar se "Fillimisht kur votojmë, konsiderojmë interesat tona si qytetarë të SHBA- së dhe të ardhmen e familjeve tona. Për ne i rëndësishëm është edhe qëndrimi i administratave karshi problemeve tona si shqiptarë dhe çështjes së Kosovës. Konsiderojmë që Serbia për ta njohur Kosovën duhet të ketë presion shumë më të madh prej dikujt, i cili jo vetëm shpërndan detyra, por edhe merr përgjegjësi. Ne konsiderojmë që Trump është kandidat që kërkon përgjegjësi. Kemi fakte që përfaqësuesi ynë i shqiptarëve republikanë në komunën 6 kishte një kontakt me zëvendëspresidentin Pence në Miçigan, ku kishte mundësi t'i shprehë kërkesat e komunitetit tonë karshi përfundimit të dialogut Kosovë- Serbi. Zoti Pence... iu përgjigj letrës që i dërguam dhe siguroi se në bisedimet Kosovë- Serbi nuk do të ketë ndarje apo "bosnjëzim" të Kosovës. Siguroi edhe se marrëveshja përfundimtare do të përfundojë me njohje. Në marrëveshje do të përfshihet ndihma për zhvillim ekonomik dhe do të bashkëpunojë me cilëndo parti që fiton zgjedhjet demokratike në Kosovë", shtoi Demaj. Nga ana tjetër, përkrahësja e demokratëve në SHBA, Anila Nicholas, tha se letra e fushatës së Joe Biden ku flitej për vizionin për shqiptarët është autentike. Në emisionin "Pressing" në T7, Kosovë, ajo tha se "Joe Biden është një mik i Shqipërisë dhe Kosovës por edhe komunitetit shqiptar. Unë jam një ndër përkrahëset e shqiptarëve që e mbështesin. Ai do të angazhohet për të drejtat e shqiptarëve në Kosovë dhe Shqipëri, por edhe kudo që janë. Kjo ka qenë një ndër arsyet që kemi krijuar grupin e shqiptarëve për Joe Biden", ka thënë ajo. "Vizioni i Biden për shqiptarët u ndërtua në kohën sa ishte nënpresident. Këtu erdhi edhe letra që u publikua nga ' IllyriaPress'", shtoi ajo.