Liga: Bojkoti vazhdon, rifillojmë nëse ka ‘ tym të bardhë’ nga qeveria
Nisja e kampionatit në Shqipëri është aq mister, sa tanimë njerëzit e futbollit kanë nisur të përmendin se duhet pritur njëlloj si "tymi i bardhë" në Vatikan. Rituali i përzgjedhjes së Papës së ri, është ai që njoftohet me "tymin e bardhë". Presidenti i Ligës Profesioniste të Futbollit, as një mbledhje që dje ka zgjatur më pak sesa herët e tjera, thuajse vetëm një orë, ka deklaruar se bojkoti do të vazhdojë. Edvin Libohova, si për ta lartësuar edhe më tepër vendimin unanim të përfaqësuesve të Ligës, e krahasoi edhe me "tymin e bardhë" në Vatikan, të cilin e pret si ndryshim qëndrimi nga qeveria.
Presidenti - Edvin Libohova, shpalosi dy vendimet e ndërmarra, ku i pari është për vijimësinë e bojkotit si dhe i dyti është për të ndërprerë bashkëpunimin në vijim me emisionin sportiv në RTSGH- së. "Liga unanimisht vendosi që bojkoti të vazhdojë deri në momentin që qeveria do të plotësojë kërkesat tona. Pika e dytë e vendimeve ishte që duke parë mënyrën se si është trajtuar emisioni sportiv në televizionin shqiptar, duke parë një qëndrim jo koherent dhe jo mbështetës për futbollin, Liga vendosi që për RTSH- në të mos përsërisë kontratën e ' highlightseve' dhe të bashkëpunimit për sezonin që do të vijë. Këto ishin dy vendimet", deklaroi Libohova. Më tej iu përgjigj pyetjeve:
"Sigurisht! Nëse do të ketë ' tym të bardhë' kur i thonë, do të ndryshojë. Ne jemi në dinamikë. Mirëpresim që të zgjidhen kërkesat dhe problematikat tona. Në momentin që ato zgjidhen, menjëherë Liga është e gatshme që të rifillojë garën. Me qeverinë vetëm kanë filluar bisedimet, nuk ka vendimmarrje. Unë shpresoj që nesër ( sot) përfaqësuesit e Ministrisë së Financave dhe të parlamentit të vijnë me një propozim, i cili të jetë i pëlqyeshëm nga
Liga, pra në plotësim të kërkesave tona. Në të kundërt, do të vazhdojmë në këtë situatë. RTSH? Anëtarët e Ligës kanë gjykuar duke parë disa herë emisionin, si dhe emisionin e djeshëm. Unë konkretisht nuk e kam parë. Ata ishin të indinjuar se si u trajtua problemi dhe kërkesat që ka pasur Liga për sa i përket mbështetjes së futbollit. Shqetësimi ishte vetëm për misionin sportiv dhe mënyrën se si është trajtuar komplet emisioni. Që nuk është në përputhje me interesat e Ligës dhe të futbollit. Liga? Dhjetë duan që të mos fillojë dhe asnjë nuk do që të fillojë", tha Libohova.