Ndryshon skema, si do aplikohet për pension

Rishikohet skema e aplikimit për të përfituar pension. Dokumentet dhe procedura që duhet të ndjekin rreth 20 mijë individë në vit për të përfituar pagesën mujore

Janë më shumë se 20 mijë të moshuar, të cilët çdo vit mbushin moshën e daljes në pension.

Prej fillimit të këtij viti qytetarëve iu është krijuar mundësia që aplikimin për pension ta kryejnë “online”. Kjo do të thotë që nuk do të jetë më e nevojshme që këta të moshuar të paraqiten pranë drejtorive rajonale të sigurimeve, pasi shërbimi do të mund t’u ofrohet brenda një kohe të shkurtër dhe pa shumë mund, përmes portalit e- albania. “Tashmë ju nuk keni nevojë të paraqiteni pranë sporteleve pritëse të Agjencive Lokale të Sigurimeve Shoqërore për të marrë shërbim apo informacion, por mund ta realizoni atë nëpërmjet smartfonit apo kompjuterit tuaj. Nga data 6 janar 2020, duke klikuar në https:// e- albania. al/, ju mund të kryeni lehtësisht procedurat për të gjitha shërbimet që ofron edhe Instituti i Sigurimeve Shoqërore”, specifikohet në postimin e Institutit të Sigurimeve Shoqërore ku përmes një videoje janë treguar hapat që duhet të ndiqen nga qytetarët, të cilët duan të aplikojnë për pension pleqërie.

APLIKIMI Për të aplikuar fillimisht shkoni në portalin e- albania. Në dritaren që do të hapet zgjidhni atë në të cilën shkruhet “Puna”. Do t’ju shfaqen tri opsione, qytetarë, biznes dhe administratë. Pasi të vendosni të dhënat tuajA, përkatësisht numrin e kartës së identitetit dhe fjalëkalimin atëherë do t’ju shfaqen shërbimet që ofrohen. Do të kërkoni “aplikim për pension pleqërie” dhe para jush do të jetë baza ligjore për llogaritjen dhe kushtet e përfitimit të pensionit.

Më tej do të plotësoni formularin me të dhënat tuaja si data e lindjes, vendlindja, adresa, numër telefoni, llojin e pensionit për të cilin aplikoni, mënyrën e përfitimit pra nëse doni që pensioni t’ju dërgohet përmes postës apo nëpërmjet bankës, vendin e punës si edhe në fund dokumentacionin shoqërues që kërkohet nga ISSh- ja për këtë proces. Ndonëse kjo skemë ofron lehtësi, jo të gjithë pensionistët mund të përfitojnë prej saj. Ndaj edhe në këto kushte, ata të cilët e kanë të pamundur që të aplikojnë “online” kanë metodën e vjetër, atë të dorëzimit të dosjes në sportelet e agjencisë së sigurimeve. SKEMA E PENSIONEVE

Aktualisht skema publike e pensioneve ofron tri lloje pensionesh: pensionin e pleqërisë, të invaliditetit dhe atë familjar. Për të fituar të drejtën e një pensioni pleqërie, individi duhet të kontribuojë për një periudhë sigurimi të përcaktuar jo më pak se 15 vjet dhe mund të marrë pension kur mbush moshën 65 vjeç për burrat dhe 61 vjeç për gratë, të cilat në vitin 2032 do të arrijnë moshën 65 vjeç. Ndërsa për të përfituar pension të plotë duhen 37 vite kontributive. Formula e re përcakton një pension bazë dhe shtesën. Pensioni bazë është 7637 lekë, ndërsa shtesa bazuar në formulën e llogaritjes së pensionit, është 1% për çdo vit sigurimi, shumëzuar me bazën mesatare të vlerësueshme, që personat e siguruar kanë arritur nëpërmjet kontributeve të paguara. “Bazë mesatare e vlerësuar” nënkupton pagën bruto, mbi të cilën është aplikuar norma e kontributit të detyrueshëm të sigurimeve shoqërore sipas viteve dhe është kjo pagë mujore, që rivlerësohet e aktualizohet duke përdorur koeficientet e indeksimit të çdo viti, deri në momentin e lindjes së të drejtës dhe plotësimit të kushteve për të përfituar një pension.