Vrasja e biznesmenit, çfarë tha autori në Gjykatë
Kliti Leka është lënë në masë sigurimi "Arrest në burg", Gjykata i cakton avokat kryesisht për t'u mbrojtur në gjyq
Gjykata e Vlorës ka zhvilluar dje seancën gjyqësore ndaj Kliti Lekës, 53vjeçarit të akuzuar për vrasjen e biznesmenit Niko Goro në Himarë mëngjesin e së shtunës së kaluar, më 17 tetor.
Ndaj Lekës, Gjykata ka pranuar kërkesën e Prokurorisë dhe ka caktuar masën "Arrest me burg" deri në përfundim të hetimeve. 53- vjeçari ishte i pranishëm në seancën gjyqësore, i qetë dhe shumë i ftohtë përballë togave të zeza. Prokuroria e Vlorës e akuzon Kliti Lekën për veprat penale "Vrasja në rrethana cilësuese" dhe "Mbajtja pa leje e armëve luftarake dhe municionit". Organi i akuzës është përfaqësuar nga prokuror Arjan Xhaferri, ndërsa seanca është drejtuar nga gjyqtar Arqile Basho. Mbrojtja ndaj të akuzuarit është caktuar kryesisht nga ana e Gjykatës.
AUTORI
I shoqëruar nga dy punonjës të Policisë, përmes xhamit të kafazit në sallën e gjyqit, 53vjeçari herë pas here hidhte vështrime të ftohta ndaj gazetarëve. Seancën e djeshme nuk ka qenë i pranishëm asnjë familjar i të akuzuarit. Kliti Leka u është përgjigjur pyetjeve që gjyqtari i ka drejtuar në dhënien e gjeneraliteteve. "Jam beqar, kam bërë 14 vjet shkollë, duke përfunduar deri në vitin e dytë universitet. Me profesion jam radiolog dhe pas vitit 1990 jam larguar nga Shqipëria, për t'u rikthyer sërish. Kam lindur në 19 qershor të vitit 1967, ndërsa nuk jam dënuar asnjëherë më parë", është shprehur fillimisht 53- vjeçari Leka. Më tej, Leka është shprehur para gjykatës duke pohuar arsyen e vrasjes së biznesmenit Goro në Himarë. "Kishim një marrëveshje noteriale me Niko Goron, për ndërtimin e një pallati në një truall rreth 2600 metra katror në Himarë. Është rënë dakord ndërtimi i një pallati dhe unë do të përfitoja tri hyrje, si një nga trashëgimtarët e tokës. Niko nuk iu përmbajt kësaj marrëveshjeje. Ditën e ngjarjes, pas krimit jam larguar me një automjet të cilin e kisha marrë me qira. U fsheha në afërsi të zonës Livadh në Himarë dhe nuk kam bërë rezistencë ndaj forcave të Policisë", ka deklaruar në gjykatë i akuzuari.
MOTIVI I NGJARJES
Shkak për ngjarjen që tronditi Himarën mëngjesin e datës 17 tetor, dyshohet se mund të jetë një marrëveshje e lidhur dy vite më parë, ku Kliti Leka do t'i vinte në dispozicion tokën që zotëronte në Himarë, mbi të cilën biznesmeni Niko Goro do të ndërtonte pallatin. Në fakt, Niko Goro e ka ndërtuar objektin mbi sipërfaqen e tokës dhe është në fazë përfundimi, por nuk ia kishte dhënë pjesën që i takonte Kliti Lekës. Pjesa takuese ishte përllogaritur në tri apartamente, por Kliti Leka mendohet se ka marrë vetëm një apartament, megjithatë kjo mbetet ende për t'u vërtetuar. Shpesh mes Goros dhe Lekës ka pasur negociata dhe gjatë kësaj periudhe 53- vjeçari e ka ndjerë veten të mashtruar nga biznesmeni, e për pasojë ka shkuar drejt vendimit ekstrem. Ditën e shtunë Leka ka zbritur nga makina tip "Volkswagen" dhe ka qëlluar në drejtim të Goros me kallashnikov 5 herë. Vetëm pak minuta pas ngjarjes, disa kilometra larg, në vendin e quajtur Livadhet, është arritur kapja e autorit, ndërkohë që është gjetur arma e krimit, kallashnikovi, por edhe një pistoletë, si dhe makina "Volswagen". Sipas burimeve, autori nuk ka qenë i maskuar dhe ka vepruar i vetëm në krim. Ai është ndaluar nga Policia teksa mundohej të largohej, por makina e tij ishte lokalizuar shumë shpejt, pasi dëshmitarët në vendngjarje treguan me detaje karakteristikat e mjetit.