Krisafi: “Deti” në Hagë, duhet miratimi i Presidentit
“Kufijtë janë përcaktuar, mbetet vetëm zona ekonomike ekskluzive”
Deklarata për ta vendosur në Gjykatën e Hagës ndarjen e kufirit detar mes Shqipërisë dhe Greqisë në Jonin Verior është analizuar nga profesori i së Drejtësi Ndërkombëtare, Kesnofon Krisafi. Në një intervistë për “Abc news”, Krisafi tha se kemi të bëjmë me një dakordësi të kushtëzuar, por theksoi se ka besim se çështja do të marrë zgjidhje në këtë Gjykatë pasi kemi të bëjmë me një organ ndërkombëtar të pakorruptueshëm, ndërsa theksoi se Shqipëria është në të drejtën e saj, pasi kufijtë janë tashmë të përcaktuar, ndërsa e vetmja çështje në tryezë është zona ekonomike ekskluzive. Ai u shpreh se nëse preket kufiri shtetëror, të dyja palët do të kenë pretendime dhe kjo do të sillte precedentë të tjerë. “Nuk ka barazi palësh. Rruga e negociatave biletarale nuk e dha rezultatin e pritshëm. Në këto kushte mbetet faktori i tretë, Gjykata Ndërkombëtare ose një palë e tretë. Nisur nga fakti se nga kush përbëhet Gjykata e Hagës, nga njerëz të pakorruptueshëm, unë gjykoj se çështja atje duhet të marrë një zgjidhje. Shqipëria është në të drejtën e saj pasi kufijtë e saj i ka të përcaktuara. Mbetet të caktohet vetëm zona ekonomike ekskluzive”, tha Ksenofon Krisafi. Më tej, eksperti i së Drejtës Ndërkombëtare shtoi se tashmë kjo çështje është në dorën e Presidentit Ilir Meta, pasi vetëm ai mund të japë miratimin, ndërsa palët do duhet të nënshkruajnë një marrëveshje për ta dërguar çështjen e detit në Gjykatën Ndërkombëtare. “Unë atë që tha sot Rama dhe Dendias e marr si një transmetim që vjen nga pala greke për ta çuar në Hagë dhe jo si vendim. Këto janë çështje që kanë të bëjnë me territore. Nuk mundet të kenë ata vendimmarrje për ta çuar në Hagë. Janë një sërë punësh për t’u bërë para. Nuk mundet të vendosë vetëm Kryeministri sepse Haga do të bëhet kompetente kur palët të çojnë një marrëveshje. Miratimin për këtë marrëveshje e jep kryetari i shtetit, i cili konsultohet me disa hallka para se të shkojë në vendimmarrje. Gjykata e Hagës nuk është si gjykatat e vendit. Palët duhet të bien dakord dhe të nënshkruajnë një marrëveshje. Nëse Gjykata konstaton se ka edhe probleme të tjera, duhet të abstenojë. Unë jam i bindur që për çështje të tilla Presidenti dhe Kryeministri bëhen një dhe prevalojnë mbi interesat personale. Shqiptarët janë të interesuar për fatet e kësaj Shqipërie. Ata që janë në krye të shtetit, e kanë për detyrë të bien dakord”, deklaroi Krisafi.