Meta me Dendias: Inkurajoj marrëveshje të përhershme
Presidenti: Marrëveshja duhet të jetë në përputhje me Konventën e Kombeve të Bashkuara mbi Ligjin e Detit dhe vendimin e Kushtetueses
Kreu i shtetit, Ilir Meta, priti dje në mesditë në një takim zyrtar ministrin grek të Punëve të Jashtme, Nikos Dendias.
Takimi zgjati më shumë se 30 minuta, ndërsa vetë kreu i shtetit, përmes një postimi në “Facebook” bëri me dije se kishte inkurajuar ministrin grek për një zgjidhje të përhershme të çështjes së detit mes dy vendeve. Në postimin e tij në “Facebook” kreu i shtetit thekson se marrëveshja duhet të jetë e përhershme dhe duke zbatuar konventat ndërkombëtare për detin dhe vendimin e Gjykatës Kushtetuese në Shqipëri. “Në lidhje me çështjen e delimitimit të hapësirës detare ndërmjet dy vendeve, inkurajoj të trajtohet përmes një dialogu të sinqertë dhe respekti reciprok, duke synuar një zgjidhje të përhershme dhe të qëndrueshme. Marrëveshja për këtë çështje të rëndësishme duhet të jetë në përputhje me Konventën e Kombeve të Bashkuara mbi Ligjin e Detit, me legjislacionin e të dyja vendeve dhe vendimin e Gjykatës Kushtetuese të Republikës së Shqipërisë”, shkroi Presidenti në “Facebook”. Në fokus të takimit të dy zyrtarëve të lartë ka qenë edhe minoriteti grek në Shqipëri dhe komuniteti shqiptar në shtetin helen. Sipas Presidentit, të dyja palët shërbejnë si një urë lidhëse për të forcuar marrëdhëniet mes dy shteteve. “Pakica greke në Shqipëri është një urë e fortë për miqësinë tonë të gjatë, dhe së bashku me shqiptarët që jetojnë në Greqi, përbëjnë themelet e marrëdhënieve tona të shëndosha dhe afatgjata”, shkroi kreu i shtetit në “Facebook” pas takimit që zhvilloi me ministrin e Jashtëm grek. Ndërkohë, në vijim Meta shprehet në statusin e tij se i ka kërkuar ministrit grek që të forcojnë bashkëpunimin midis dy vendeve. “Vlerësova marrëdhëniet ShqipëriGreqi si ndër prioritetet kryesore të politikës sonë të jashtme dhe theksova se duhet të vazhdojnë të zhvillohen në frymën e fqinjësisë së mirë, të lidhura nga interesat strategjike, partneriteti i ngushtë në NATO, perspektiva e përbashkët europiane dhe interesat ekonomike të të dyja vendeve”, bën me dije Presidenti. Ndërkohë, dy ditë më parë, kreu i shtetit, Ilir Meta, në një konferencë për gazetarët, akuzoi qeverinë dhe kreun e saj se nuk u ka kthyer përgjigje letrave zyrtare të institucionit që ai drejton. “Besoj se Rama e ka marrë përgjigjen me kohë.
Përgjigjet e mia kanë qenë bashkëpunuese dhe transparente. Prej vitesh nuk kam marrë asnjë përgjigje për kërkesat e mia zyrtare, shtetërore, për këtë çështje, nga ana e Kryeministrit. Kjo është një çështje që kërkon bashkëpunimin e autoriteteve brenda vendit dhe nuk është një çështje që mund të zhvendoset vëmendja e madhe e shqiptarëve për të ardhmen e zgjedhjeve në Shqipëri. Ky është problemi më i madh që ka Shqipëria sot”, u shpreh Meta. Ndërkohë, më herët ministri i Jashtëm i Greqisë, Nikos Dendias, u takua edhe me kreun e qeverisë, Edi Ramën. Në deklaratën për shtyp, si Kryeministri Rama, dhe Ministri Dendias, u shprehën se kanë rënë dakord që çështja e delimitimit të detit të shkojë në gjykatën ndërkombëtare.