“Shëndetësia në kolaps”, Basha: Rritja e numrit të testimeve, emergjente

Për të disatën herë, kryedemokrati Lulzim Basha i bën thirrje qeverisë të rrisë urgjentisht numrin e testimeve. Duke sjellë në vëmendje shifrat kokëforta të ndërkombëtarëve, Basha deklaron se Kryeministri Edi Rama, me politikën e tij po e fundos shëndetësinë. “Papërgjegjshmëria kriminale e Edi Ramës ka çuar në kolaps shëndetësinë, ka dëbuar mjekët, ka lënë shqiptarët në mëshirë të fatit. Zgjidhja emergjente është rritja e numrit të testimeve, rimbursimi i plotë për marrjen e mjekimit ambulator kundër COVID- 19, mbështetja financiare e mjekëve dhe infermierëve dhe shtimi i numrit të tyre”, shkruan kreu i Partisë Demokratike në një postim në rrjetet sociale, të cilin e shoqëron me një video ku tregon shifrat kokëforta të pandemisë që prej muajit mars, që e rendisin Shqipërinë në fund të listës, qoftë për mjekë, investime në shëndetësi apo testime. “Prej muajit mars kanë humbur jetën 454 shqiptarë. Mijëra të tjerë janë infektuar. Ndërkohë që shqiptarët luftojnë për jetën, prioriteti i Edi Ramës nuk është shëndeti i tyre, por tenderët sekretë dhe koncesionet korruptive. Për këtë arsye jemi vendi me numrin më të ulët të mjekëve në Europë ( OBSH), vendi me buxhetin më të ulët për shëndetësinë në Europë ( FMN), vendi me numrin më të ulët të testimeve për COVID në Europë”, brendashkruhet në videon e postuar nga kryedemokrati, teksa shton se çdo lek duhet të shkojë për shqiptarët dhe jo në xhepat e pushtetarëve. Të njëjtën gjë thonë shifrat e “Worldmeters”. Siç pasqyrohen në tabelën përbri, ku listohen shtetet me më pak testime për 1 milion banorë në Europë, Shqipëria kryeson. Madje, edhe vendi i dytë pas nesh, numëron gati 2- fishin e atyre të kryera te ne. Në dhjetëshen e vendeve me më pak testime është edhe Maqedonia, e cila sidoqoftë figuron të ketë kryer 3- fish më shumë. Sipas Bashës, kërcënimi më i madh për shëndetin e shqiptarëve është vetë Kryeministri Rama. Ky nuk është apeli i parë që Lulëzim Basha i bën qeverisë për të rritur numrin e testimeve, veçanërisht në sektorë jetikë, që janë në vijën e parë të frontit, shëndetësi dhe arsim.