Trafik të miturish, prostitucion e grabitje, OFL letër 3 të dënuarve
TIRANE – Një person i dënuar për shfrytëzim prostitucioni, një tjetër për trafik të miturish dhe i treti për vjedhje me armë, kanë marrë letër dje nga Operacioni Forca e Ligjit, për të deklaruar pasurinë brenda 48 orësh. OFLja ka shpërndarë dje formularët për tre të dënuarit, një në Berat dhe dy të tjerë në Tiranë. Policia e Shtetit tha dje se, në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL- ja u ka nisur kërkesat me shkrim për vetëdeklarimin e burimeve të pasurisë, shtetasve: Ferdianat Etemaj alias Ferdinand Etemi, banues në Berat, i dënuar për veprën penale “Shfrytëzimi i prostitucionit”; Elton Drapi, banues në Tiranë, i dënuar për veprën penale “Trafikimi i të miturve”; Dorjan Memaj, banues në Shkozë, i dënuar për veprën penale
“Vjedhja me armë”, e kryer në bashkëpunim. Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL- së dhe më pas, përgjigjet e marra do t’i dërgohen SPAK- ut për veprime të mëtejshme. “OFL- ja është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special. OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë”, tha zyrtarisht Policia.