Fidel Ylli: Duhet ligj nga qeveria për gjobat, përgjigjja të premten

Liga Profesioniste e Futbollit nuk tërhiqet nga bojkoti edhe pas takimit të dytë të zhvilluar në nivel ekspertësh në Ministrinë e Financave.

Pas mbledhjes që ka zgjatur thuajse 50 minuta, Presidenti i Ligës ka deklaruar se është diskutuar me specialistët dhe Ministren e Financave, të cilët kanë kërkuar kohë deri ditën e premte për të dhënë versionin e tyre final për kërkesat që ka artikuluar Liga. Në fjalën e tij para mediave, Libohova nuk ka qenë i prerë, por disi edhe kontradiktor teksa në krye të deklaratës ka thënë që situata është një hap larg zgjidhjes, por më tej ka vijuar duke thënë se nuk është arritur asnjë marrëveshje dhe gjithçka është rikthyer në pikën fillestare. E gjithë kjo, në rast se nuk do të ketë dakordësi dhe vullnet politik të Kryeministrit Rama. Presidenti i Ligës Zoti Libohova, sa rezultativ ishte ky takim?

Është një hap më pranë zgjidhjes. Problemet që u diskutuan ishin në dy pjesë: në 3 pikat më pak të rëndësishme, për të cilat ne gjetëm gjuhën e përbashkët dhe do të kemi një prononcim nga Ministria e Financave së shpejti. Ndërkohë që për ligjin e sponsorizimit që është edhe "thembra e Akilit" e gjithë kësaj situate, debatuam duke propozuar dhe gjetur atë që do të jetë më e mira. Ministria me kolegët kërkoi kohë dhe deri ditën e premte do të kemi një përgjigje përfundimtare për një zgjidhje, e cila besoj se do të pranohet edhe nga komuniteti i sportit dhe futbollit për të filluar një epokë të re.

A do të fillojë futbolli këtë javë?

Futbolli do të fillojë mbasi ne të kemi një përgjigje, e cila do të kënaqë kërkesat tona. Nuk mund të them që do të fillojë këtë javë apo javën tjetër.

Çfarë propozimi morët nga Ministria e Financave për ligjin e sponsorizimit në këtë takim të dytë?

Nuk morëm asnjë propozim nga Ministria, vetëm diskutim. Ata do të reflektojnë ridiskutimet dhe propozimet tona.

A ka një variant të miratuar mes palëve në nivel ekspertësh për kërkesat e adresuara nga sporti?

Jo, jo! Nuk ka një variant të miratuar, sepse në tavolinë janë 2 të tilla: Varianti ekzistues që ka miratuar Parlamenti përpara disa muajsh, në dhjetor si dhe varianti i propozuar prej nesh. Ekspertët bashkë me ministren po diskutojnë që cili nga variantet kënaq ekzigjencat tona. Ne këmbëngulim te varianti jonë. Do të presim deri ditën e premte për të marrë një përgjigje.

Atëherë nuk ka asnjë dakordësi dhe jemi ende në të njëjtat kushte?

Akoma nuk ka dakordësi. Nuk është e kollajtë, negociatat zgjasin.

Kjo do të thotë që përgjigjen e prisni nga Kryeministri?

Variantet që Ministria e Financave do të përzgjedhë, do t'ia propozojë Kryeministrit. Përgjigjen përfundimtare e presim nëpërmjet Ministrisë së Financave nga Kryeministri.

Zoti Fidel Ylli deklaroi që tri pikat janë zgjidhur. Janë zgjidhur siç i ka kërkuar Liga?

Shikoni, varianti që ka kërkuar Liga ka brenda elasticitetin për t'u diskutuar. Nuk mund të zgjidhen me një të rënë të lapsit. Ministria do të paraqesë shumë shpejt qëndrimin e saj për zgjidhjen e të 3 pikave, të cilat besoj se janë të pranueshme nga komuniteti i sportit. Po bojkoti i garës? Bojkoti vazhdon deri sa ne te kemi përgjigjen përfundimtare që të kënaqi kërkesat tona.

Negociatori mes qeverisë dhe Ligës Profesioniste të Futbollit ka dhënë edhe një herë tjetër sinjale optimizmi për zgjidhjen e situatës. Në deklaratën e bërë dje përkrah kreut të Ligës te Financat, Fidel Ylli pranoi që ekspertët kanë diskutuar dhe dakordësuar edhe disa pika, por në fund "vulën" do ta japë kreu i qeverisë, ditën e premte.

Çfarë ndodhi në këtë takim të dytë me Ligën Profesioniste?

Sot kishim takimin e dytë me Ligën Profesioniste të Futbollit. Ishte një takim ku në të shumtën e rasteve, problemet e Ligës thuajse janë të zgjidhura. Kemi ngelur vetëm te problemi i ligjit të sponsorizimit. Edhe Ministrja ishte shumë bashkëpunuese sot. Të them të drejtën, kërkohet edhe një konfirmim nga qeveria për faljen e gjobave, pasi në qoftë se do të bëhet kjo, do të bëhet me një ligj në parlament. Kërkon një vendim politik dhe nuk mund të bëhet një falje vetëm për Ligën apo për futbollin, por do bëhet për të gjitha bizneset. Duke e parë këtë situatë ne mendojmë që përgjigjja përfundimtare do të jepet ditën e premte, mbasi ne të bisedojmë me Kryeministrin, do t'i japim zgjidhje përfundimtare gjithë këtyre problemeve që Liga ka shprehur.

Duke qenë më pranë Kryeministrit, sa gjasa ka që këto pika të Ligës të miratohen dhe të shohim më në fund futboll?

Unë e kam thënë që në fillim, që Kryeministri është shefi i qeverisë, por në fund të fundit Kryeministri punon me stafet. Ai nuk mund të marrë vendime pa u konsultuar me Ministren e Financave, me këshilltarët, me grupin e punës etj... Që ai vendim të mos jetë sa për të kaluar radhën, por të jetë që sportit do t'i vlejë. Sportit duhet t'i vlejë për një afat shumë të gjatë. Ne po debatojmë dhe debatet sjellin gjithmonë zgjidhjen e problemit. Unë jam i bindur që kjo situatë do të zhbllokohet shumë shpejt. Por kur flitet për financat, të jeni të sigurt që gjithë ministrat e financave dhe këshilltarët debatojnë, sepse jemi në një vit shumë të vështirë, tërmet, pandemi, biznese të rrënuara dhe qeveria ka vështirësi të mëdha. Ju thoni që janë zgjidhur 90% e kërkesave... Po jua deklaroj që janë zgjidhur 90% e kërkesave. Të tria pikat janë zgjidhur dhe ka mbetur vetëm ligji i sponsorizimit. Ka 2 variante, varianti jonë dhe i Ligës. Të dyja variantet konvertojnë në të njëjtat shuma dhe duhet gjetur modaliteti se si do zgjidhet.