Hoti: Nëse nuk ka marrëveshje, kthejmë reciprocitet me Serbinë

Kryeministri i Kosovës, Avdullah Hoti, ka thënë se marrëveshja finale me Serbinë do të arrihet kur të dyja vendet do të arrijnë të pajtohen për të gjitha çështjet.

Në interpelancën para ligjvënësve të Kuvendit të Kosovës, të thirrur për Asociacionin, Hoti tha të mërkurën: “Ekziston marrëveshja e parimeve për Asociacionin e Komunave me shumicë Serbe dhe komentet e Gjykatës Kushtetuese. Çdo veprim në këtë rrafsh do të bëhet në pajim më to. Nuk do të lejohet shkelje e rendit kushtetues të Kosovës. Nuk ka pajtim për asgjë, derisa nuk pajtohemi për çdo gjë në rend të parë për njohjen reciproke”. Hoti është shprehur i bindur se brenda pak muajsh do të përmbyllet dialogu me Serbinë dhe se nuk ka asnjë iluzion për këtë çështje. Sipas Hotit, dialogu do të përmbyllet me njohje reciproke ose do të konstatohet së bashku me partnerët ndërkombëtarë se nuk do të ketë marrëveshje. E atëherë, siç tha Hoti do të ketë reciprocitet të plotë ndaj Serbisë. “Ky dialog është vetëm për marrëveshjen finale me njohje reciproke. Ky dialog është çështje muajsh, nuk kam iluzione për këtë. Nuk e di a do të përmbyllet me njohje reciproke, nuk e di a do të përfundojë me njohje, do të doja të përmbyllet me njohje. E di që do t’i vijë fundi për disa muaj dhe do të sjellim një marrëveshje për njohje reciproke në këtë Kuvend, ose do të konstatojmë së bashku me partnerët se nuk mund të arrihet kjo marrëveshje. Ju garantoj se kthehemi te vendosja e reciprocitetit të plotë në çdo aspekt me Serbinë”. Në Kuvendin e

Kosovës është diskutuar edhe për miratimin e qarkores për mosaplikimin në organizata ndërkombëtare, ku deputetë të opozitës thanë se nëse është e vërtetë se ajo qarkore ekziston, është gabim i madh.

Pas deklaratës së Hotit në Kuvendin e Kosovës për kthimin e masave të reciprocitetit të plotë me Serbinë, ka reaguar drejtori i një zyre për Kosovën në Qeverinë e Serbisë, Petar Petkoviç. Ai tha se Hoti “nuk duhet të mendojë se do ta detyrojë Beogradin të bëjë lëshime dhe se nuk duhet të jetojë në iluzionin se dikush ka frikë nga kërcënimet e tij”. “Me pikëpamjet e tij ekstremiste, Hoti mund ta dëmtojë jo vetëm veten, por edhe bashkëqytetarët e tij dhe stabilitetin e rajonit, gjë që ne nuk e duam. Pres që bashkësia ndërkombëtare ta qortojë ashpër Prishtinën...”, tha Petkoviç.