Kuvendi miraton rezolutën kundër antisemitizmit, Mike Pompeo folësi kryesor në Forumin Ballkanik në Tiranë
VLERESIME NGA SHBA, BE E IZRAELI, RUÇI: SHQIPERIA, SHTEPI E DYTE PER HEBRENJTE
Kuvendi i Shqipërisë miratoi dje rezolutën “Për miratimin e përkufizimit të përdorshëm për antisemitizmin, përcaktuar nga Aleanca Ndërkombëtare për Përkujtimin e Holokaustit”, propozuar nga kryetari i Grupit Parlamentar të PS- së, Taulant Balla, dhe deputetja Blerina Gjylameti.
Rezoluta e votuar dje unanimisht nga 111 deputetët e pranishëm në Kuvend, mbështetet në përcaktimin e kësaj Aleance, e cila bashkon qeveritë dhe ekspertët për avancimin e vlerave që përkujtojnë Holokaustin, sipas Deklaratës së Stokolmit të vitit 2000. Përkufizimi dënon ndjenjat e urrejtjes ndaj individëve hebrenj dhe johebrenj, komuniteteve, pronave dhe institucioneve komunitare e fetare të hebrenjve, si edhe perceptimet denigruese ndaj tyre, përpjekjet për të mohuar Holokaustin dhe për të zbatuar standarde të dyfishta në qëndrimet ndaj Izraelit. Miratimi i kësaj rezolute ndodh vetëm pak ditë para organizimit nga Kuvendi, në partneritet me Lëvizjen Kundër Antisemitizmit dhe Agjencinë për Hebrenjtë të Izraelit, të Forumit të parë Ballkanik Kundër Antisemitizmit. Forumi do të zhvillohet më 28 tetor dhe synon të krijojë një front të bashkuar të vendeve ballkanike për të punuar bashkërisht kundër antisemitizmit. Rezoluta e miratuar dje nga Kuvendi adopton disa deklarata dhe rezoluta të organizmave ndërkombëtarë në luftën ndaj antisemitizmit. “Kuvendi do të miratojë përkufizimin e përdorshëm mbi antisemitizmin, jo të detyrueshëm ligjërisht, të përcaktuar nga Aleanca Ndërkombëtare për Përkujtimin e Holokaustit, sipas të cilit: ‘ Antisemitizmi është një perceptim i caktuar për hebrenjtë, i cili mund të shprehet si urrejtje ndaj hebrenjve. Manifestimet retorike dhe fizike të antisemitizmit drejtohen ndaj individëve hebrenj ose johebrenj dhe/ ose ndaj pronës së tyre, ndaj institucioneve dhe objekteve fetare të komunitetit hebraik’”, thuhet në rezolutën e Kuvendit. Përmes kësaj rezolute, Kuvendi i kërkon qeverisë shqiptare “të përdorë këtë përkufizim pune mbi antisemitizmin, jo të detyrueshëm ligjërisht, të përcaktuar nga Aleanca Ndërkombëtare për Përkujtimin e Holokaustit, si një instrument orientues në fushën e edukimit, si dhe për mbështetjen e autoriteteve juridike dhe ndëshkimore në përpjekjet e tyre për zbulimin dhe goditjen me efikasitet të sulmeve antisemitike; të vazhdojë dhe të forcojë luftën ndaj çdo shfaqjeje të intolerancës dhe diskriminimit që mund të çojë në akte urrejtjeje dhe dhune, përfshirë dhe antisemitizmin; të rrisë masat sensibilizuese dhe edukative në kuadrin e luftës kundër manifestimeve të intolerancës dhe diskriminimit, përfshirë dhe antisemitizmin”. SHBA Miratimi i kësaj rezolute u ndoq nga afër dhe nga disa ambasadorë të huaj në vendin tonë, mes të cilëve edhe ajo amerikane, Yuri Kim. Në një reagim në rrjetet sociale, pas votimit në Kuvend, ambasada e SHBAsë në Shqipëri e cilësoi miratimin e kësaj rezolute si një vijim të traditës së Shqipërisë në luftën kundër urrejtjes. “Sot ( dje) Parlamenti miratoi përkufizimin e Aleancës Ndërkombëtare të Përkujtimit të Holokaustit për Antisemitizmin. Ky akt vazhdon traditën e gjatë të Shqipërisë në luftën kundër urrejtjes. Na kujton gjithashtu historinë e Shqipërisë dhe strehimin e viktimave të persekutimit në mënyrë të guximshme, pa marrë parasysh koston dhe pavarësisht rrezikut. Shtetet e Bashkuara janë krenare që e quajnë Shqipërinë një partnere dhe aleate ndërsa vazhdojnë angazhimin e tyre për dinjitetin e çdo individi”, shkruhej në postimin e Ambasadës në “Twitter”.
SORECA I pranishëm në votimin e rezolutës ishte edhe ambasadori i BE- së në Shqipëri, Luigi Soreca, i cili vlerësoi vendosmërinë e Shqipërisë për të luftuar çdo formë të antisemitizmit. “Mirëpresim rezolutën e miratuar sot nga Parlamenti shqiptar që bën përkufizimin e Aleancës Ndërkombëtare të Përkujtimit të Holokaustit mbi Antisemitizmin. BE- ja, e vendosur të luftojë të gjitha format e antisemitizmit dhe të nxisë jetën hebreje. Në mbështetje të veprimeve kombëtare, BEja do të paraqesë një strategji gjithëpërfshirëse mbi antisemitizmin në 2021- shin”, deklaroi ambasadori i BEsë, Luigi Soreca.