Ndihma për krizën, Basha: FMN e rendit Shqipërinë të fundit në BE
Kryedemokrati: Vendimet sa i përket shpalljes së rezultateve finale do t’u takojnë institucioneve të Partisë Demokratike
Kryedemokrati Lulzim Basha publikoi dje një tabelë të përgatitur nga Fondi Monetar Ndërkombëtar në lidhje me ndihmën ekonomike të akorduar nga çdo shtet për të përballuar krizën ekonomike të shkaktuar nga masat e marra kundër Covid- 19.
Në konferencën për shtyp, kryedemokrati evidentoi se Shqipëria renditet e fundit në BE, me vetëm 0.86 të GDP- së të disbursuar për ndihmën e qytetarëve. Por Basha akuzon K r y e m i n i s t r i n Rama se edhe në projektbuxhetin e vitit 2021 nuk ka reflektuar asnjë gjë nga gabimet e këtij viti. “Prapa meje do të projektohet një grafik i publikuar nga Fondi Monetar Ndërkombëtar, i cili tregon se Shqipëria, kolona e fundit e kuqe, në kolonën e vendeve në zhvillim, Shqipëria ka investuar vetëm 0.86% për t’u përballur me pandeminë dhe pasojat ekonomike të pandemisë. Është vendi i fundit në Europë. Pra sot, e kemi të shpallur publikisht nga një nga institucionet kryesore të botës, Fondi Monetar Ndërkombëtar. Një vend me dy paketa anemike, të cilat nuk u disbursuan të plota. Disbursimi total i të dyja paketave ishte 101 milionë euro. Për miliona shqiptarë që janë në vështirësi, kaq lekë ndau Edi Rama, ndërkohë që shqiptarëve iu ka marrë pothuajse 40 herë më shumë para si taksa, si tatime, si tarifa gjatë vitit që po përfundon”, tha kreu i PD- së. Por çfarë parashikon projektbuxheti i vitit të ardhshëm që po diskutohet këto kohë në Kuvend?! “Ky është një njeri i cili deri në ditën e fundit që të ketë pushtet, ka për të grabitur Shqipërinë dhe shqiptarët, edhe kur kjo i kushton Shqipërisë dhe shqiptarëve jetë njerëzish dhe shkatërrimin e tyre ekonomik. Ky është mesazhi i projektbuxhetit të vitit 2021. Le të vijmë te realiteti: E vetmja shifër që qeveria raporton, janë gjobat që vendos për ata që s’mbajnë maskë. Testimet vazhdojnë të mbeten më të ulëtat në Europë dhe në rajon. Financimi për shëndetësinë vazhdon të mbetet dramatikisht më i ulëti në rajon. Ndihma për biznesin që po falimenton është zero. Ndihma për familjet që kanë humbur vendin e punës është zero”, vijoi Basha.
PROCESI NË PD Gjithashtu, dje nuk mund të anashkalohej përfundimi i procesit të nisur rreth 4 muaj më parë në Partinë Demokratike për kandidatët për deputetë dhe kryetar bashkie. I pyetur për fazat e mëtejshme pas përfundimit të punës së komisionit të vlerësimit, Basha u shpreh: “E gjithë procedura e emërimit apo vlerësimit të kandidaturave deri në vendimmarrjen finale të organeve statutore ka qenë një procedurë publike. Natyrisht, vendimet sa i përket shpalljes së rezultateve finale, do t’u takojnë institucioneve të partisë, kur ky proces të ketë përfunduar plotësisht”, tha Basha.
KOALICIONET Në një kohë që maxhoranca ndryshoi Kodin Zgjedhor pa dakordësinë e opozitës politike, këta të fundit kanë menduar edhe planin “B” se çfarë ndodh nëse edhe pas dekretit të Presidentit maxhoranca nuk reflekton për të mos prekur formulën e koalicioneve. Dje kryedemokrati Basha miratoi deklaratën e dy ditëve më parë të aleates së tij, Monika Kryemadhi, se mund të shkojnë në zgjedhjet e 25 prillit me dy koalicione. “Mendoj se është shteruese përgjigjja që ka dhënë zonja Kryemadhi. Ne i konsiderojmë hapat e njëanshëm të Edi Ramës dhe pseudomaxhorancës të tij të paligjshëm, antikushtetues dhe në dhunim të marrëveshjes së 5 qershorit dhe në shkelje të standardeve të zgjedhjeve të lira dhe të ndershme të OSBE/ ODIHR- it dhe Kodit të Praktikave të Mira të Komisionit të Venecias”, tha Basha.