Rezoluta kundër antisemitizmit, mediat izraelite, jehonë votimit në Kuvend
Votimi i djeshëm në Kuvendin e Shqipërisë për miratimin e rezolutës kundër antisemitizmit ka gjetur një shpërndarje shumë të gjerë në mediat ndërkombëtare. Duke filluar me ato në Izrael, në SHBA, por edhe media të rëndësishme në Europë e kanë raportuar miratimin e kësaj rezolute, duke e cilësuar si një risi për gjithë Europën, por edhe duke theksuar ndihmën që populli shqiptar ka dhënë hebrenjtë gjatë Luftës së Dytë Botërore, kur ata u përndoqën nga nazistët. Gazeta prestigjioze izraelite, “The Jerusalem Post” shkruan se Shqipëria është ndër të parat vende me shumicë myslimane që miraton përkufizimin. “Parlamenti shqiptar ka mbështetur punën e Aleancës Ndërkombëtare të Përkujtimit të Holokaustit ( IHRA) për përkufizimin e antisemitizmit duke e bërë Shqipërinë një nga vendet e para me shumicë myslimane që miraton përkufizimin. Përkufizimi i IHRA- së, një organizatë ndërqeveritare që përfshin 34 vende anëtare, është një klasifikim i antisemitizmit i rënë dakord ndërkombëtarisht dhe i përdorur për të ndihmuar në përcaktimin dhe luftimin e antisemitizmit në vendet që e kanë miratuar atë. Vendimi i sotëm vjen përpara Forumit të Ballkanit Kundër Antisemitizmit që po zhvillohet në partneritet midis Parlamentit të Republikës së Shqipërisë, Lëvizjes kundër Antisemitizmit dhe Agjencisë Hebraike për Izraelin”, shkruhet në artikullin e “The Jerusalem Post”. Por edhe në gazetën e madhe amerikane, “The Washington Post” ka gjetur vend lajmi për miratimin e rezolutës kundër antisemitizmit. “The Washington Post” e cilëson si një vijim të traditës së mirë të popullit shqiptar në këtë drejtim.