Rama paralajmëron mbyllje: Mos e sfidoni shtetin, do merrni goditje
Në pritjen e 60 respiratorëve të rinj që iu shtuan sistemit shëndetësor falë donacionit të NATO- s e SHBA- ve, Kryeministri Edi Rama u bëri apel qytetarëve që të jenë të përgjegjshëm në luftën ndaj Covid- 19. Një thirrje të veçantë lëshoi për pronarët e restoranteve dhe lokaleve, që të mos kontribuojnë për një mbyllje të dytë me pasoja katastrofike. “Dua të rikthehem aty ku e nisëm, në luftën me Covid, dua t’ju lutem qytetarëve të mos e bëjnë këtë luftë më të vështirë, ju lutem e përgjërohem atyre që nuk e besojnë se sa e vështirë është kjo betejë, që mbyten në lugën e konspiracionit dhe thashethemeve. Atyre që kanë restorante, bare, të mos e përqeshin rrezikun, të mos e sfidojnë shtetin dhe mirëkuptimin tonë e ta marrin si dobësi. Të mos vënë në rrezik njerëzit, ka protokolle ku janë të përcaktuara rregullat. Nuk është e vështirë për ne të sulim Policinë, por a është kjo ajo që duam? A duan të kontribuojnë në mbylljen e lokali, të marrin goditje marramendëse financiare për shfrytëzimin e ca metrave katrorë më shumë për ca lekë më shumë?!”. Kreu i qeverisë iu përgjigj zërave kritikë për shërbimin në spitalet Covid, duke lënë të kuptohej se përpos shifrave në rritje të përditësuar, ende nuk ka ardhur koha të hapen dy strukturat e reja për pacientët me Covid. “Fatkeqësi e madhe se si zëra që janë me mikrofon dhe që amplifikohen për shkak të detyrës përmes burimeve të informacionit flasin për mungesë kapacitetesh në spitale, tregojnë një realitet të frikshëm që nuk ekziston, sikur spitalet tona janë tejmbushur dhe njerëzit lihen korridoreve që të vdesin. Fatkeqësi e madhe shumë. Sot, gjithë spitalet tona janë ende me kapacitete të lira që po shkojnë duke u zvogëluar, por që janë dy struktura të reja që presin në rast se do të kemi nevojë”, deklaroi Rama, pasi falënderoi ndërkombëtarët për solidaritetin e treguar në një situatë të vështirë.