NJOFTIMI I POLICISË
Një automjet është djegur qëllimisht orët e para të mëngjesit të djeshëm në zonën e Ujit të Ftohtë, në Vlorë.
Burime nga Policia e Vlorës bënë të ditur se mjeti është në pronësi të shtetasit Olsi Kafazi, ndërsa makina ka qenë e parkuar shumë pranë banesës së tij. Sipas Policisë ngjarja është e qëllimshme, ndërsa automjetit tip "Nissan Micra", me targa VL 7260 C, i është hedhur lëndë djegëse benzinë. Mjeti i parkuar është shkrumbuar plotësisht, ndërsa kanë nisur menjëherë hetimet për këtë ngjarje për të bërë të mundur identifikimin e autorëve. Pas kësaj ngjarjeje, shtetasit Olsi Kafazi i është marrë dëshmia në komisariatin e Policisë, ku ka mohuar të ketë konflikte me persona të tjerë. "Nuk e di pse mund të ketë ndodhur djegia e automjetit, ashtu edhe ngjarja e rreth 20 ditëve më parë, kur më sulmuan natën disa persona që nuk i njoh. Nuk kam pasur apo të kem konflikte me persona të tjerë, apo të jem grindur me ndonjë njeri që të shkojnë deri në djegien e automjetit, por dhe të më godasin para derës së shtëpisë", ka thënë 35- vjeçari. Ndërkohë, burimet nga uniformat blu bënë të ditur se shtetasi Olsi Kafazi është një person pa precedent penal, ndërsa është punonjës i Ujësjellës- Kanalizimeve në Vlorë. Deri pak kohë më parë, Kafazi ka punuar me Task- Forcën e Ujësjellësit në terren, ndërsa aktualisht ushtron detyrën si ekonomist në Ujësjellës- Kanalizime Vlorë.
SULMI FIZIK Rreth 20 ditë më parë, persona ende të paidentifikuar, e kanë sulmuar 35- vjeçarin para shtëpisë së tij në zonën e Ujit të Ftohtë, në momentin kur kthehej në banesë. Për shkak të goditjeve të shumta, 35- vjeçari Kafazi kaloi disa ditë i shtruar në spitalin rajonal të qytetit të Vlorës, ndërsa edhe për atë ngjarje nuk ka ende persona të identifikuar. Kjo edhe për shkak se ishte natë dhe personat që e sulmuan përfituan nga errësira në zonë dhe mos prania e kamerave të sigurisë.
Më datë 22.10.2020, në mesnatë, në lagjen "Uji i Ftohtë", Vlorë, është djegur plotësisht automjetit i markës "Nisan", në pronësi të shtetasit O. K., 35 vjeç, banues në Vlorë. Grupi hetimor po punon për zbardhjen e rrethanave të ngjarjes, identifikimin dhe kapjen e autorit.
Tashmë rreth tri javë më vonë, 35- vjeçarit i djegin edhe automjetin, ndërsa sërish nuk ka persona të identifikuar për këtë ngjarje.
HETIMET Policia po heton të dyja ngjarjet që ndodhën në një kohë mjaft të shkurtër, ndërsa nga burime të saj mësohet se ngjarja e tri javëve më parë, kur 35- vjeçari është sulmuar fizikisht para shtëpisë së tij, besohet se është e lidhur plotësisht me ngjarjen e djegies së automjetit. Megjithatë 35- vjeçari ka mohuar të ketë pasur përplasje, ndërsa një nga pistat është ajo që lidhet me punën e tij, në kohën kur ka qenë pjesë e task- forcës me
Ujësjellës- Kanalizime Vlorë. Në zonën ku është sulmuar tri javë më parë, i njëjti vend edhe me djegien e automjetit mungojnë kamerat e sigurisë çfarë vështirëson hetimet e bluve për identifikimin e autorëve. Megjithatë pritet edhe ndonjë detaj më shumë, ndoshta edhe nga banorë të zonës, nëse kanë parë lëvizje të dyshimta apo kanë parë persona që nuk i njohin përreth asaj zone. Çfarë mund të ndihmojë Policinë në zbardhjen e ngjarjes së djegies së automjetit, por pse jo edhe të ngjarjes së rreth tri javëve më parë, kur 35vjeçari u sulmua fizikisht pranë banesës së tij.